Պաշտոնից չկառչելու դաս՝ Անահիտ Ավանեսյանի արտասահմանյան գործընկերների կողմից

Առողջապահության նախարար Անահիտ Ավանեսյանը ջանք ու եռանդ չի խնայում իր ռեֆորմները հանրությանը իբրև անչափ օրակարգային և աննախադեպ հրամցնելու համար: Վերջերս էլ նախարարը հպարտության նոր առիթ է գտել. դա իր անխոնջ պայքարն է սնդիկի և աղի դեմ, որը, սակայն, հանրության մեծ մասի մոտ տրամաբանական հարց է առաջացնում՝ արդյո՞ք Ավանեսյանը և իրենք ապրում են նույն իրականության մեջ, քանի որ Հայաստանի հասարակության իրականության մեջ կան շատ ավելի լուրջ և օր առաջ լուծում պահանջող հարցեր, քան սնդիկն ու աղն է: 

Այսօր էլ ԱԺ-ում ներկայացնելով իր նախորդ տարվա ձեռքբերումները, նախարարը փաստացի ընդունեց, որ խնդիրների մի զգալի հատվածը դեռևս լուծված չեն: Ամենաուշագրավ անկեղծացումը թերևս այն էր, որ Հայաստանը փաստորեն  100 տոկոսով դեղերի ապահովվածություն չունի, իսկ դե շտապօգնության ծառայությունն էլ այնպես են բարեփոխել, որ ավելի հեշտ է մահանալ, քան կանչ գրանցել:

Մինչ Ավանեսյանը զբաղված է աշխատանքի բուռն իմիտացիայով, նրա արտասահմանցի գործընկերները զբաղված են գործով: Դիցուք՝ հարևան Վրաստանում առողջապահության համակարգի ռեֆորմները բերել են նրան, որ պետությունը անապահով խավի ներկայացուցիչների համար սահմանել է վաուչեռներ, որոնցով վերջիններս կարող են ձեռք բերել առողջության ապահովագրման պոլիսներ: Բացի այդ, մեծ աշխատանք է տարվել առողջապահական ծառայություններն ամբողջ ծավալով երկրի ծայրամասերում հասանելի դարձնելու համար:

Գերմանիայում առողջապահության ոլորտում իրականացված բարեփոխումների արդյունքում ձևավորվել է հիմնադրամ, որից էլ ֆինանսավորվելու են առողջապահության ապահովագրման կասսաները: Բացի այդ, ռեֆորմների արդյունքում քառակի անգամ ավելացել է ոլորտի պետական ֆինանսավորումը: Գյուղական բնակավայրերում ցուցաբերվող անհետաձգելի բուժօգնության որակի կտրուկ բարելավում է տեղի ունեցել: 5 տոկոսով ավելացել են սոցիալական նպաստները` կապված տնային պայմաններում իրականացվող խնամքի հետ:

Ավելորդ է նաև նշել, որ Ավանեսյանի արտասահմանցի գործընկերները հրաժարականի դիմումներ են ներկայացրել շատ ավելի փոքր բացթողումների պատճառով: Դիցուք՝ Մեծ Բրիտանիայի առողջապահության նախկին նախարար Մեթ Հենքոկը, վերջինս համաճարակի ամենաթեժ փուլում հանդգնել է աշխատավայրում....համբուրվել գործընկերուհու հետ:

Կոսովոյի առողջապահության նախարար Ռիֆաթ Լյաթիֆին հրաժարական էր ներկայացրել, քանի որ ինքը անձամբ գոհ չէր իր իսկ կատարած աշխատանքի արդյունավետությունից:

Սլովակիայի առողջապահության նախարար Վլադիմիր Լենգվարսկին հրաժարական էր ներկայացրել այն բանից հետո, երբ վերջինիս աշխատանքը քննադատության էր ենթարկվել երկրի վարչապետի կողմից: