Ինչպես է փոխվել ԱԺ ՝ 0 ՕԳԳ ունեցող պատգամավորների սոցիալական վիճակը պաշտոնը ստանձնելուց հետո

Վերլուծական 20 Ապրիլ, 2023 19:51

Հունիսյան արտահերթ խորհրդարանական ընտրություններից հետո հանրությանը թվում էր, որ ԱԺ-ում հայտնված պատգամավորները էլ ավելի ակտիվորեն կլծվեն երկրի առաջ ծառացած խնդիրների լուծմանը և կդադարեն լինել պարզապես կոճակ սեղմողներ: Անցել է մեկ տարուց էլ ավել, սակայն ակնհայտ է, որ գործող խորհրդարանում այս պահին էլ մեծ թիվ են կազմում հանրությանը անհայտ պատգամավորները, որոնց անունները չի լսվում, կամ գրեթե չի լսվում մեդիա դաշտում և որոնք անգամ ամբիոնին այս ընթացքում չեն մոտեցել: Ուշագրավ է համեմատականներ անցկացնել այս պատգամավորների պաշտոնը ստանձնելու օրվա դրությամբ ներկայացրած և տարեկան հայտարարագրերի միջև:

«Իմ քայլը» խմբակցության պատգամավոր Արուսյակ Ջուլհակյանի՝ պաշտոնը ստանձնելու հայտարարագրում նշված է 8000.00 ԱՄՆ դոլարի և 3100000.00 ՀՀ դրամի արժեթղթեր: 1,500,000.00 ՀՀ դրամի, 2,500.00 ԱՄՆ դոլարի, 1,000.00 եվրոյի դրամական միջոցներ:

Պատգամավոր Գևորգ Պապոյանը հայտարարագրել է մեկ բնակարան, VOLKSWAGEN BORA 1.6, VAZ 2107 և SAAB 9-3 2.0 L ավտոմեքենաները, 1200000.00 ՀՀ դրամի և 7500.00 ԱՄՆ դոլարի դրամական միջոց: Պաշտոնը ստանձնելու պահին էլ վերջինիս դրամական միջոցները կազմել են 200,000.00 ՀՀ դրամ:

Պատգամավոր Թագուհի Ղազարյանը, ով հաճախ է հայտնվում տարատեսակ զավեշտալի պատմությունների կիզակետում, հայտարարագրել է ընդամենը 1000 դոլար։ Այժմ պատգամավորը հայտարարագրել է 7 միլիոն դրամի եկամուտ, 2 միլիոն դրամ բանկային հաշվին:

Լիլիթ Ստեփանյանը ունի 500 հազար դրամ կանխիկ գումար և 7,844,670.00 դրամի աշխատանքից ստացված վարձատրություն:

Նարեկ Ղահրամանյանը 2019-ին Աուդի մակնիշի ավտոմեքենա է ձեռք բերել, բանկային հաշվի մնացորդը կազմում է 800,000.00 դրամ, կանխիկ գումարը՝ 3,000,000.00 դրամ:

Ռուստամ Բաքոյանի բանկային հաշվի մնացորդը, ըստ նրա հայտարարագրի, կազմում է 1,118,257.00 դրամ, կանխիկը՝ 15,000,000.00 դրամ և 12,000.00 ԱՄՆ դոլար: Աշխատանքից ստացված վարձատրությունը կազմում է 7,813,540.00 դրամ:

Մաթևոս Ասատրյանի անշարժ գույքի քանակը պահպանվել է՝ 8-ն է: Ավտոմեքենաները երկուսն են՝ 2016 թվականին ձեռք բերված Toyota-ն եւ UAZ-ը: Բանկային հաշվին 2020 թվականի սկզվին առկա է եղել 227 հազար դրամ, որը տարեվերջին դարձել է 258 հազար դրամ, իսկ կանխիկ դրամը 1 մլն դրամից դարձել է 1 մլն 500 հազար դրամ: ՔՊ-ական պատգամավորի խորհրդարանից ստացած աշխատավարձը կազմել է 7 մլն 789 հազար դրամ, այսինքն՝ ամսական 649 հազար դրամ: Նա նաեւ ՀՀ առեւտրային բանկերից մեկից ստացել է 389 հազար դրամի չափով փոխառություն, վարկ: Պարզվում է՝ 2021 թվականի տարեկան հայտարարագրում ՔՊ-ական պատգամավորի կյանքում դրական փոփոխություն է տեղի ունեցել, նա բնակարանատեր է դարձել: Վերջինս նաև 30 մլն 399 հազար դրամով կամ 72 հազար դոլարով բնակարան է գնել Երեւանի Աջափնյակ վարչական շրջանում: Գործարքի մյուս կողմը «Նորիկ-70» ընկերությունն է:

Վահե Ղալումյանի՝ պաշտոնը ստանձնելու հայտարարագրում նշված են չորս հողամասերը, մեկ անհատական բնակելի տունը, երկու բեռնատարները: Նվիրատվության կամ օգնության կարգով ստացված գույքը, դրամական միջոցները (բացառությամբ աշխատանքի), ծառայության տեսքով ստացած դրամական միջոցները կազմել են 150,000.00 ռուբլի: Ուշագրավն այն է, որ արդեն տարեկան հայտարարագրում հողամասերը և անգամ անհատական բնակելի տունը անհետացել են, չկան նաև բեռնատարները, որոնցից միայն մեկի ճակատագիրն է հայտնի՝ այն օտարվել է 1,930,000.00 դրամով, իսկ հարկային տարում Ղալումյանի դրամական միջոցները կազմել են 3,630,643.00 դրամ:

ՔՊ-ական պատգամավոր Մերի Գալստյանը պաշտոնը ստանձնելու պահին հայտարարագրել էր ընդամենը 317 հազար դրամ։ Իսկ ահա 2022-ին վերջինիս եկամուտները կտրուկ աճ են արձանագրել և կազմել են 14 միլիոն 343 հազար դրամ։

Պատգամավոր Ալխաս Ղազարյանը պաշտոնը ստանձնելիս հայտարարագրել էր որպես բանկային հաշիվների մնացորդ 67 հազար դրամ, կանխիկ դրամը կազմել է 500 հազար դրամ, իսկ եկամուտները` 308 հազար դրամ։ Տարեկան հայտարարագրում պատկերը հետևյալն է՝ բանկային հաշիվների մնացորդները կազմել են 10 հազար և 100 հազար ՀՀ դրամ, իսկ եկամուտները` 3 միլիոն 867 հազար դրամ:

Ակնհայտ է, որ պարապուրդի մատնված պատգամավորների սոցիալական վիճակը ակնհայտորեն բարելավվել է՝ հպարտ քաղաքացիների վճարած հարկերի հաշվին...