ՔՊ-ական պատգամավորն օլիգարխների շահերի լոբբինգ՞ է իրականացնում

ԱԺ տնտեսական հանձնաժողովում օրերս փակ քննարկում է տեղի ունեցել՝ ՔՊ-ականների եւ բանկերի, այդ թվում՝ Կենտրոնական բանկի ներկայացուցչի մասնակցությամբ, որը շատ թեժ է անցել։ Թեման ՔՊ-ական Գեւորգ Պապոյանի հեղինակած օրենսդրական նախագիծն է եղել, որն անցած քառօրյայում սուսուփուս, առաջին ընթերցումով ընդունվել է։

ՔՊ-ականն առաջարկում է, որ բանկը, որից քաղաքացին առաջնային շուկայից հիպոթեքային վարկով բնակարան է գնում, վարկն ամբողջությամբ չտրամադրի կառուցապատողին, դրա 25 տոկոսը փոխանցի, մնացած 75-ը` երբ բնակարանը կառուցվի եւ հանձնվի սեփականատիրոջը։ Բացատրենք, որ երբ քաղաքացին հիպոթեքով տուն է գնում, չկառուցված բնակարանի վերաբերյալ կնքված սեփականության պայմանագրերը գրավ է դնում բանկում, բանկն էլ վարկի գումարը փոխանցում է սեփականատիրոջը։

Թե որն է նման փոփոխության հիմնավորումը, նախագծում չի նշվում, իբրեւ թե քաղաքացու շահը, որ որեւէ կառուցապատող նրան «չքցի»։ Սակայն առաջին ընթերցումից հետո ոլորտում փոթորիկ է բարձրացել, մասնագետների կարծիքով՝ եթե այս առաջարկն օրենքի տեսք ստանա, ապա կարելի է շինարարական ոլորտի վրա տապանաքար դնել, քանի որ ոլորտում մենաշնորհ կձեւավորվի, եւ բազմաբնակարաններ կկառուցեն միայն դոլարային միլիարդատերերն ու օլիգարխները, քանի որ գաղտնիք չէ, որ կառուցապատողները բանկից ստացվող գումարներով են ավարտին հասցնում գործը։

Ստացվում է, որ պատգամավորի խոսքն ու գործը, մեղմ ասած, միմյանց չեն համընկնում: Մի կողմից՝ Պապոյանը մշտապես խոսում է շարքային քաղաքացիների փոքր բիզնեսը զարգացնելուց, առաջարկում է լուծումներ գտնել, ի ցույց է դնում իր մտահոգությունները ՓՄՁ ոլորտի առջև ծառացած մարտահրավերների մասով, սակայն, արի ու տես, որ գործնականում նման օրինագծեր է հեղինակում: Հետևաբար հարց է առաջանում՝ իսկ ում շահերն է իրականում ներկայացնում և պաշտպանում Գևորգ Պապոյանը...