Փաստաբանը ևս մարդ է, որի անվտանգության երաշխավորը պետք է լինի պետությունը. Լևոն Բաղդասարյան

Անթույլատրելի եմ համարում փաստաբանների մասնագիտական գործունեությունը խոչընդոտելը և փաստաբանի մասնագիտական գործունեության ընթացքում ծայրահեղ միջոց՝ բռնություն իրականացնելը, այն էլ պետական կարևորագույն լիազոր մարմնում՝ ոստիկանությունում: Այս մասին ԼՈՒՐԵՐ.com-ի հետ զրույցում ասաց փաստաբան Լևոն Բաղդասարյանը՝ անդրադառնալով հունիսի 7-ին փաստաբան Կարեն Ալավերդյանի նկատմամբ ոստիկանության բաժնում գործադրված բռնությանը:

«Այդ ի՞նչ ծայրահեղ միջոց արեց փաստաբանը, որ ոստիկանական հիմնարկում ձեռնաշղթաներ հագցնեին և պառկեցնեին գետնին: Անթույլատրելի եմ համարում, որ անցել է որոշակի ժամանակ և լիազոր մարմիններն, ունենալով պարտավորություն բարձրաձայնելու և իրավական գնահատական տալու, ցավոք մինչ այս պահը լուռ են: Փաստաբանների նկատմամբ ճնշումները լինելու են կործանարար իրավապաշտպան հարթակում: Կարծում եմ՝ նման դեպքերում հետևությունները պետք է անի Բարձր դուռը»,- նշեց փաստաբանը:

Նրա խոսքով՝ հասարակության, միջազգային և պետական լիազոր մարմինների անտարբերությունն անթույլատրելի է, որովհետև իրապաշտպան հարթակը, փաստաբանների ինստիտուտը պետականաշինության կարևորագույն դերակատարում ունի. «Փաստաբաններն արել են հայտարարություն, որոնց ես ևս միացել եմ: Մոտ օրերս որպես բողոքի ակցիա՝ փաստաբաններն անելու են գործադուլ և ցանկալի չէ, որ դա լինի շարունակական: Այստեղ պոզիտիվ պարտավորություն ունի պետական լիազոր մարմինը և լուրջ հետևություն ունի անելու Բարձր դուռը»,- ասաց փաստաբանը: 

Ըստ Բաղդասարյանի՝ փաստաբանները բաղկացուցիչ մասն են պետականաշինության և դա պետք է ընդունել որպես փաստ, հետևաբար պետք է լսելի լինեն այն բոլոր առերևույթ խախտումները, որոնք ներկայացնում են նրանք. «Փաստաբանը ցանկացած գործողություն իր տան համար չի անում, այլ՝  քաղաքացու, իրավաբանական անձի, որը կապված է մեր պետության և իրավունքի զարգացման հետ»: 

Ստացվում է՝ այսօր իրավապաշտպաններն իրենք ունեն պաշտպանության կարիք՝ մեր դիտարկմանն ի պատասխան Բաղդասարյանն ասաց. «Նախկինում ևս կարող էր լինել կամ կարող էր չլինել, բայց մենք ապրում ենք առաջընթաց և չպետք է  նայենք՝ 10 տարի առաջ ինչ էին անում: Պետք է կարողանան հասկանալ, որ փաստաբանը ևս մարդ է, որի անվտանգության երաշխավորը պետք է լինի պետությունը: Եթե փաստաբանն իր վստահորդի առերևույթ խախտած իրավունքների պաշտպանն է ու կրողը, փաստաբանի մասնագիտական  գործունեության անվտանգության ապահովողն ու կրողը պետք է լինի պետությունը: Եթե պետակա լիազոր մարմինները թերանում են, հանցավոր անգործության են մատնվում կամ անօրինականություն են թույլ տալիս, դրա պատասխանն անմիջապես պետք է տա Բարձր դուռը»,- նշեց նա՝ ընդգծելով, որ եթե փաստաբանն իրեն բռնի այն գիտակցության մեջ, որ ինքն ունի պաշտպանության կարիք, ուրեմն մենք պետք է մոռանանք իրավունքի զարգացման և պետության հզորության մասին: