Արսեն Թորոսյան-Անահիտ Ավանեսյան հեռակա մենամարտը թեժանում է

Առողջապահության ոլորտում պետպատվերով ծառայությունների կազմակերպումը զերծ չէ ռիսկերից եւ միջամտություններից։ Մամուլը այսօր գրել էր, որ Պետական առողջապահական գործակալությունում աշխատում են փորձագետներ, որոնք համատեղում են աշխատանքը նաեւ «Ուիգմոր» մանկական հիվանդանոցում։ Եվ որոշակիորեն աջակցում են իրենց կլինիկային` պետպատվեր ստանալու հարցում։

 Ի դեպ, ընդամենը երկու օր առաջ խնդրին առանց անուններ տալու անդրադարձել է նաեւ «Առողջապահության իրավունք» ՀԿ-ի հիմնադիր, ՊԱԳ նախկին տնօրեն Ծաղիկ Վարդանյանը, ով շուրջ 10 տարի բարձր պաշտոններ է զբաղեցրել նախարարությունում` անդրադառնալով մանկական պետպատվերի խնդրին, նա իր էջում գրել է․ «Կա մի «հրաշալի» նորարարություն՝ «էլիտար» աշխատակիցներ, ովքեր համատեղում են իրենց պրակտիկ բժշկի աշխատանքը պետական պատվերի դեպքեր դիտարկելու հետ»:

Նա դիմել է նաեւ ՀՀ պետական վերահսկողական ծառայություն՝ առաջարկելով․

«Ուսումնասիրեք, օրինակ, ո՞վ է դիտարկում պետական պատվերի մանկական վերականգնողական և նեղ մասնագիտական դեպքերը, կարող է պատահաբար հայտնաբերեք, որ սույն անձն աշխատում է հենց այդ նույն հիմնարկում, որի դեպքերը նա որպես առողջապահության նախարարության աշխատակից դիտարկում է: Եվ ի՞նչ կարգավորումով է, որ պետական պատվերի դեպքերն ընդունելը և, հետևաբար, գումարներ տալը կապված է տարբեր կլինիկաների շահերը ներկայացնող, հազար թելերով տարբեր հիվանդանոցների հետ կապված բժիշկներից»:

Ավելի վաղ մամուլը գրել էր, որ մինչ պաշտոնին հրաժեշտ տալը, Ծաղիկ Վարդանյանը լարված հարաբերություններ ուներ նախարար Անահիտ Ավանեսյանի հետ։ Ծաղիկ Վարդանյանը Առողջապահության նախարարության հնաբնակներից էր և Արսեն Թորոսյանի մտերիմն էր համարվում համակարգում: Իսկ Արսեն Թորոսյանը, ինչպես գիտենք, չի հաշտվել ԱԺ-ում հայտնվելու և գործադիրը լքելու մտքի հետ և ամեն կերպ փորձում է փորել գործող նախարարի ոտքի տակ: Արդյո՞ք Թորոսյանի մտերիմ համարվող Վարդանյանի այս հայտարարությունը չի կարող դիտարկվել որպես հաղորդում հանցագործության մասին, և արդյո՞ք այստեղ չի ուրվագծվում Թորոսյան-Ավանեսյան հեռակա մենամարտի հերթական ռաունդը....