Երևանն ու Բաքուն բանակցությունների վճռական փուլում են. Ալիևի ներկայացուցիչ

«Ադրբեջանն ու Հայաստանն այնքան էլ հեռու չեն խաղաղության համաձայնագրի կնքումից. Բաքուն Երևանից պատասխան է սպասում խաղաղության պայմանագրի առաջարկների վերաբերյալ»։ Այս մասին ասել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը, գրում է The Guardian-ը։

«Կարևոր է հասկանալ, որ բանակցությունների այս վճռական փուլում, երբ թվում է, թե մենք այնքան էլ հեռու չենք վերջնական համաձայնագրից, մեզ իսկապես անհրաժեշտ են արդյունքների վրա հիմնված գործողություններ», - ասել է Ամիրբեկովը:

Նա հիշեցրել է, որ պայմանագրի նախագիծը պատրաստվել է հինգ հիմնական սկզբունքների հիման վրա՝ փոխադարձ հարգանք ինքնիշխանության, տարածքային ամբողջականության և միջազգայնորեն ճանաչված սահմանների անձեռնմխելիության նկատմամբ, միմյանց նկատմամբ տարածքային պահանջներից հրաժարվելը, ուժի կիրառումից կամ դրա սպառնալիքից հրաժարվելը, ադրբեջանահայկական սահմանի սահմանազատում, Հայաստանի և Ադրբեջանի միջև կապի հանգույցների բացում։

Ադրբեջանի նախագահի ներկայացուցիչը նշել է, որ Բաքուն կցանկանար կողմերի միջև վեճերի լուծման մեխանիզմ ստեղծել։ Նրա խոսքով, խոսքը մի հոդվածի մասին է, որը «կխոսեր ինչ-որ երկկողմանի հանձնաժողովի մասին, որը պետք է ստեղծվի՝ թյուրիմացությունները կամ մեկնաբանության մեջ տարաձայնությունները վերացնելու համար»։

Ամիրբեկովն ընդգծել է, որ Ադրբեջանի հիմնական մասի և Նախիջևանի կապը «իրենց համար վճռորոշ նշանակություն ունի ազգային անվտանգության տեսակետից», ինչպես նաև այլընտրանքային ճանապարհ է։

Նրա խոսքով, Ադրբեջանն այլևս չի կարող «ժամանակ կորցնել», թեև Հայաստանը դեռ «չի սկսել 42 կիլոմետրանոց հատվածի տեխնիկատնտեսական սպասարկումը (Հայաստանի տարածքով անցնելը – խմբ.)»։

«Իհարկե, մենք չենք կարող ստիպել Հայաստանին անել այն, ինչ պարտավորվել էին անել ավելի վաղ, և անիմաստ է ենթադրել, որ մենք ներխուժելու ենք (Հայաստան - խմբ.)՝ ուժով պարտադրելու այս միջանցքը։ Այսպիսով, մենք դիմեցինք Իրանին որպես Բ պլան՝ Իրանի տարածքով ճանապարհային և երկաթուղային հաղորդակցությունների ձևավորման համար»,- ասել է Ամիրբեկովը։

Նա հայտարարելլ է, թե «այլընտրանքային երթուղու առկայությունը կարող է ստիպել Հայաստանին գիտակցել, թե որքան շատ բան կկորցնի, եթե շարունակի դիմակայել մի երթուղու, որը կարող է անցնել իր տարածքով: