ՄԻՊ Անահիտ Մանասյանը, կարծես, նույնպես լծվել է հոգեւորականներին պիտակավորելու գործին․ «Հրապարակ»

ՄԻՊ Անահիտ Մանասյանը, կարծես, նույնպես լծվել է հոգեւորականներին պիտակավորելու գործին։

Հ1-ին տված հարցազրույցում նա բնորոշել է, թե իբր եկեղեցականների շուրթերից անհանդուրժողականության խոսք է հնչել։

Հ1-ը մեջբերել է Մայր Աթոռի դիվանապետ Արշակ սրբազանի հարցազրույցից մի հատված, որտեղ նա ասում է․ «Բայց մարդիկ կան, որոնք սատանայի սպասավորներն են, մարդիկ էլ կան, որ Աստծո սպասավորներն են, եւ դա կամավոր ընտրություն է։ Հիմա ազգային եւ ապազգային ուժերի միջեւ ի՞նչ կոնսոլիդացիա եք ուզում, ի՞նչ համերաշխություն», ինչին Մանասյանն արձագանքել է․

«Եթե մենք այս ամենը դիտարկենք քաղաքական խոսքի տեսանկյունից, այդտեղ չափանիշներ որոշելը, սահմաններ դնելը․․․, ընդունում եմ գաղափարը, որ այստեղ, բնականաբար, գործ ունենք հոգեւորականի խոսքի հետ, եւ նաեւ դա է պատճառը, որ մենք պետք է կարողանանք այս ընդհանուր մթնոլորտը նկատի ունենալով՝ հնարավորինս խուսափել անհանդուրժող որեւէ խոսքի դրսեւորումներից»։ Հետո Հ1-ը մեջբերում է հատված Բագրատ սրբազանի խոսքից` ասված բուհերից մեկի դիմաց․ «Այս մարդիկ ո՞ւմ են պատրաստում այստեղ` խամաճի՞կ, ի՞նչ են պատրաստում` մա՞րդ են պատրաստում, արժե՞ք, ողորմելիների շա՞րք են պատրաստում, ուզում են՝ խամաճիկ մարդի՞կ այստեղից դուրս գան, ոչ միայն այստեղից, այլեւ բոլոր ուսումնական հաստատություններից»։

Սրբազանի խոսքերին էլ Անահիտ Մանասյանն արձագանքել է․ «Բաժանարար գծեր գծելու առումով ես արդեն ասացի՝ պետք է հնարավորինս զերծ մնալ նման խոսույթից, ինչ վերաբերում է ուսանողների՝ խոսքի ազատության, հավաքներ անցկացնելու ազատության իրացմանը, ապա նրանք պետք է ունենան հնարավորություն՝ անխոչընդոտ իրականացնելու հավաքների ազատության իրավունքը»։

Երեկ մենք Բագրատ սրբազանին փոխանցեցինք, որ Անահիտ Մանասյանն իր ու Արշակ սրբազանի խոսքերի մեջ խնդիր է տեսնում, որ հանրության մեջ բաժանարար գծեր, պառակտում են առաջացնում։ Սրբազանը նախ անդրադարձավ իր խոսքի մեջբերմանը․ «Ես ոչ մեկին որեւէ պիտակավորում չեմ տվել եւ չեմ էլ տա, իմ կյանքի սկզբունքն է, որ եթե որեւէ բան ինձ չի բավարարում, եւ եթե չեմ կարողանում մարդուն համոզել, մի կողմ եմ քաշվում, այդ մարդն իմ կյանքում կարող է շատ կամ քիչ դերակատարում ունենալ։ Ես ոչ մեկին չեմ պիտակավորել, բացարձակ, ասում եմ այն, ինչ որ կա։ Ուսանողների մասով կայքերից մեկը՝ «Արարատնյուզը» գրել էր, թե ես իբր կանգնել եմ Բրյուսովի համալսարանի մոտ, ասել եմ՝ ողորմելի եք դուք, լավ, եղած տեսանյութն ինչպե՞ս կարելի է այդպես ձեւափոխել»։ Ապա անդրադարձավ Արշակ Սրբազանին ուղղված մեղադրանքներին։

«Այսինքն՝ չարիքի հետ ո՞վ է ուզում միավորվել, իրենք ուզո՞ւմ են․․․, այ քեզ բան։ Եթե ասում ենք, որ սուտ ու ճշմարտություն կան, չարիք ու բարիք կան, հիմա այս բարիքն ու չարիքը, սուտն ու ճշմարտությունն իրար հետ միավորվո՞ւմ են։ Ճշմարտությունը պետք է հաղթի ստին, որպեսզի միավորվեն, ուրիշ ձեւ չկա։ Եթե իրենք չարիքի հետ ուզում են միավորվել, «իրենք»-ը վերացական եմ ասում, եթե որեւէ մեկը կարծում է, որ ինքը պետք է չարիքի հետ միավորվի, իր բաժինը դա է»,- ասաց Սրբազանը՝ ընդգծելով, որ Արշակ Սրբազանը ոչ թե բաժանարար գիծ է տանում, այլ հակառակը` միավորող խոսք է ասում։