75 տարեկանում ծխելը թողնելը կյանքին լրացուցիչ 0,7 տարի է տալիս. AJPM

Միչիգանի համալսարանի ամերիկացի գիտնականները պարզել են, որ ծխելուց հրաժարվելը ցանկացած տարիքում առավելություն է առողջության համար եւ երկարացնում է կյանքը։ Հետազոտությունը հրապարակվել է American Journal of Preventive Medicine (AJPM) գիտական ամսագրում։

Ծխախոտի ծուխը պարունակում է հազարավոր թունավոր քիմիկատներ, որոնք վնաս են պատճառում գրեթե բոլոր օրգաններին եւ կապված են քաղցկեղի բազմաթիվ տեսակների, ինսուլտի, սրտի եւ թոքերի հիվանդությունների հետ։

Մասնագետները չափել են ծխելու ազդեցությունը կյանքի տեւողության վրա 35-75 տարեկան մարդկանց շրջանում՝ 10 տարի միջակայքով։

Հետազոտողներն օգտագործել են մահացության հարաբերակցությունը բոլոր պատճառների հետ՝ պայմանավորված ծխելով, որպեսզի կազմեն կյանքի տեւողության աղյուսակները, որոնք ցույց կտան ծխելուց հրաժարվելու առավելությունները տարբեր տարիքում։

Այն մարդկանց համեմատ, ովքեր երբեք չեն ծխել, ծխողները 35, 45, 55, 65 կամ 75 տարեկանում կկորցնեն կյանքի միջինը 9,1, 8,3, 7,3, 5,9 եւ 4,4 տարի համապատասխանաբար, եթե շարունակեն ծխել մինչեւ կյանքի վերջ։

Բայց եթե նրանք ծխելը թողնեն այդ տարիքներից յուրաքանչյուրում, նրանք կխուսափեն 8,0, 5,6, 3,4, 1,7 եւ 0,7 տարի միջին կորստից համապատասխանաբար։

Արդյունքները ցույց են տվել, որ մարդկանց մոտ 10 տոկոսը, ովքեր կթողնեն ծխելը 65 տարեկանում, կյանքը կերկարացնեն առնվազն ութ ամսով նրանց համեմատ, ովքեր դա չեն անի։

Կյանքը երկարացնելու շանսերը գոնե մեկ տարով նրանց համար, ովքեր կհրաժարվեն ծխել 65 տարեկանում, կկազմեն 23,4տոկոս, եւ 14,2 տոկոս 75 տարեկանում, նշել են գիտնականները։

Բացի այդ, 75 տարեկանում ծխելը թողնող մարդկանց 8 տոկոսը կյանքը կերկարացնի առնվազն չորս տարով նրանց համեմատ, ովքեր կշարունակեն ծխել։

աղբյուր՝ med.news.am