«Արվեստը միայն փող աշխատելու համար չէ». Կոպոլան՝ Marvel ֆիլմերի մասին

Վերջերս «Կնքահայրը» և «Մեգալոպոլիս» ֆիլմի ռեժիսոր Ֆրենսիս Ֆորդ Կոպոլան պատասխանել է Cinepop-ի լրագրողի հարցին, թե արդյոք նա համարում է Marvel կոմիքսների հիման վրա ստեղծված  ֆիլմերը կինոյի իսկական տարր։

Ըստ Կոպոլայի, Marvel Studios-ի ֆիլմերում դերասանները ցուցադրում են իրենց փայլուն տաղանդը՝ «արժանի հիացմունքի»։ Սակայն ռեժիսորը միաժամանակ նշել է, որ արվեստի ցանկացած գործ չպետք է միտված լինի միայն շահույթ ստանալուն, քանի որ դրա իմաստն այլ է։

«Գիտեք, սա բարդ հարց է։ Կարծում եմ, որ Marvel-ի ֆիլմերում շատ տաղանդներ կան, ինչը հիացմունքի արժանի է: Բայց արվեստի նպատակը ժամանակակից կյանքը լուսավորելն է, ոչ թե մարդկանց փող  բերելը»,- ասել է նա։

Նախկինում Կոպոլան ավելի կոշտ է արտահայտվել Marvel-ի կոմիքսների վրա հիմնված նախագծերի մասին՝ նշելով, որ նման նախագծերը փչացնում են կինոարդյունաբերությունը և արժեզրկում այն։