Սևան համայնքի պատվիրակությունն աշխատանքային այցով մեկնել է Ֆրանսիայի Հանրապետություն

 Սևան համայնքի պատվիրակությունը Սևան համայնքի ղեկավարի առաջին տեղակալ Արթուր Մարգարյանի գլխավորությամբ, աշխատանքային այցով մեկնել  է Ֆրանսիայի Հանրապետություն:

 Սևանի  համայնքապետարանի աշխատակազմից տեղեկացրին, մեկշաբաթյա այցի ընթացքում Ֆրանսիայի Հանրապետությունում նախատեսված են մի շարք հանդիպումներ և միջոցառումներ, մասնավորապես՝ հանդիպում և աշխատանքային քննարկում քույր քաղաք Գրենոբլի փոխքաղաքապետ Էմանուել Կարոզի հետ, Վիեն քաղաքում հանդիպում փոխքաղաքապետ Լևոն Սաքունցի հետ, որի ընթացքում Սևան, Գրենոբլ, Վիեն, Գորիս, քաղաքների, Իզերի և Գեղարքունիքի մարզերի ներկայացուցիչները կներկայացնեն 2024 թվականին իրականացված ծրագրերը, 2025թվականին նախատեսված աշխատանքները, ինչպես նաև՝ ապակենտրոնացված համագործակցության կարևորությունն ու նշանակությունը համայնքների և մարզերի կյանքում։

Այցի ընթացքում նախատեսված են հանդիպումներ Ֆրանսիական տուրիստական  կազմակերպությունների հետ: 

Աֆրատ կազմակերպությունը այցի օրերին նախատեսում է քայլարշավ դեպի Ֆրանսիական Վերքորի լեռնաշղթա։

Միջոցառումների ցանկում է նաև Ֆրանսիայի ազգային հերոս Միսակ Մանուշյանի որմնանկարի մոտ երդմնակալության արարողության կազմակերպումը։

Այցը կեզրափակվի Գրենոբլի Հայ մշակույթի տանը կազմակերպվող ընդունելությամբ։

«Հիշեցնենք, որ Սևան-Գրենոբլ ապակենտրոնացված համագործակցությունն ունի 20-ամյա կենսագրություն: Համագործակցության ուղղություններն են՝ զբոսաշրջություն, առողջապահություն, ֆրանսախոսություն, վերականգնող էներգետիկա: 

Բոլոր ուղղություններով իրականացվել և իրականացվում են մի շարք ծրագրեր և նախաձեռնություններ, որոնց շնորհիվ հնարավոր է եղել հիշյալ ոլորտներում գրանցել տեսանելի արդյունք»,-ներկայացրին Սևանի համայնքապետարանի աշխատակազմից: