«Դոմոդեդովո» օդանավակայանում վարձկանության մեջ մեղադրվող ՀՀ քաղաքացի է բերման ենթարկվել

«Դոմոդեդովո» օդանավակայանում բերման է ենթարկվել ՀՀ քաղաքացի, ով կռվել է Ուկրաինայի զինված ուժերի կողմից ԴԺՀ-ում, ԼԺՀ-ում և Խերսոնի մարզում, նա այժմ ձերբակալված է, ՌԻԱ Նովոստիին հայտնել են ՌԴ Քննչական կոմիտեի մամուլի ծառայությունից։

«Բերման է ենթարկվել Հայաստանի քաղաքացի, ով որպես վարձկան մասնակցել է Ուկրաինայի կողմից ռազմական գործողություններին»,- ասվում է հաղորդագրության մեջ։

Ըստ հետաքննության՝ 2022 թվականի նոյեմբերին Հայաստանի քաղաքացի Արմեն Բալյանը Մոլդովայի հետ սահմանով ժամանել է Ուկրաինա, որտեղ պաշտպանական ստորաբաժանումների կազմում մինչև 2023 թվականի դեկտեմբեր ամիսը մասնակցել է Դոնեցկի և Լուգանսկի Ժողովրդական Հանրապետություններում, ինչպես նաև Խերսոնի մարզում տեղի ունեցած մարտերին։ Ընդգծվում է, որ 2024 թվականի օգոստոսին Բալյանին հեռակա կարգով մեղադրանք էր առաջադրվել և նրա նկատմամբ հետախուզում հայտարարվել։