Ֆրանսիացի 30 քաղաքական գործիչներ կոչ են արել բոյկոտել Բաքվում կայանալիք COP29 համաժողովը և «ղեկավարել հայ պատանդների ազատ արձակման ու Հայաստանի տարածքային ամբողջականության վերականգնման արշավը»

Ֆրանսիացի երեսուն քաղաքական գործիչներ կոչ են արել Ֆրանսիայի կառավարությանը բոյկոտել COP29 համաժողովը, որը պետք է մեկնարկի նոյեմբերի 11-ին` Բաքվում։ Այս մասին հայտնում է Le Figaro-ն:

Նրանք դատապարտել են Ֆրանսիայի մասնակցությունն այս միջոցառմանը` այն համարելով աջակցություն Ադրբեջանի ավտոկրատ և կոռումպացված ռեժիմին, ինչպես նաև անտեսելով Հայաստանի դեմ ուղղված սպառնալիքները։

«Իրավապաշտպան կազմակերպությունները, ինչպիսիք են Human Rights Watch-ը և Freedom Now-ն, հաղորդել են Ադրբեջանում քաղաքացիական հասարակության նկատմամբ ճնշումների, ինչպես նաև քաղբանտարկյալների, այդ թվում՝ մարդասեր և բարերար Ռուբեն Վարդանյանի և 22 հայ պատանդների նկատմամբ ոտնձգությունների մասին»,-գրում է պարբերականը:

Քաղաքական գործիչները նշում են, որ անհնար է խոսել շրջակա միջավայրի պաշտպանության մասին՝ անտեսելով հյուրընկալող երկրում տեղի ունեցող քաղաքական ճնշումներն ու բռնությունները։ Նրանք կոչ են անում Ֆրանսիայի կառավարությանը ազդանշան ուղարկել Ալիևի կառավարությանը՝ բոյկոտելով COP29-ը և ղեկավարել հայ պատանդների ազատ արձակման, Լեռնային Ղարաբաղից 120 000 փախստականների վերադարձի և Հայաստանի տարածքային ամբողջականության վերականգնման միջազգային արշավը։