«Օվերտոնի պատուհանը» բացեց հենց Արարատ Միրզոյանը․ Մադաթյանը՝ «կվադրոբերների» մասին (տեսանյութ)

Վերջին շրջանում համացանցում՝ միջազգային մակարդակով, ակտիվորեն տարածվում են «կվադրոբեր» կոչված մարդկանց մասնակցությամբ տարատեսակ տեսանյութեր։ Դրանք հիմնականում դեռահասներ են, որոնք շան կամ կատվի դիմակով և պոչով քայլում են փողոցներում՝ չորս ոտքերի վրա և ընդօրինակում կենդանիների շարժումները։

Ըստ հոգեբան Միհրդատ Մադաթյանի՝ Հայաստանում «կվադրոբերների» մասին առաջին անգամ խոսակցություններ սկսվեցին այն ժամանակ, երբ հանդիպեցին ՀՀ և ՌԴ ԱԳ նախարարները։ Այդ օրը ոչ պաշտոնական զրույցում, ՀՀ ԱԳ նախարար Արարատ Միրզոյանը, պատասխանելով ՌԴ ԱԳ նախարար Սերգեյ Լավրովի այն հարցին, թե ՀՀ-ում «կվադրոբերներ» կան, պատասխանել էր՝ այո։

«Չգիտես՝ ինչու և ինչ փաստերի վրա հիմնվելով, Լավրովի «կվադրոբերների» մասին հարցին Արարատ Միրզոյանը շտապեց պատասխանել, որ Հայաստանում «կվադրոբերներ» կան։ Փոխարենը մտածեր՝ իր հետ խոսելու ուրիշ թեմաներ չունի՞ ՌԴ ԱԳ նախարարը, որը բավականին ստաժավոր դիվանագետ է։ Այս զրույցից հետո մենք՝ «Մադաթյան» հոգեբանական կենտրոնի մասնագետներս, երկար ուսումնասիրություններ սկսեցինք ու փորձեցինք գտնել այդ «կվադրոբերներին»։ Գտանք երկու երեխայի, որոնք շենքի բակում խաղալուց հետո «պոչերը» դրեցին գրպանները և առաջ անցան։ Այսինքն՝ Արարատ Միրզոյանի ներկայացրած «կվադրոբերներն» այդ երկու երեխա՞ն էր»,- հարց բարձրացրեց Մադաթյանը։

«Տեսեք՝ «Օվերտոնի պատուհանը» բացեց հենց Արարատ Միրզոյանը։ Թեմատիկ առումով մեր Արտաքին գործերի նախարարն ի՞նչ կապ ուներ «կվադրոբերների» հետ, չգիտեմ․․․»,- շեշտեց նա ու ընդգծեց ՝ պիտի փորձենք տարբերվել ԱԳ նախարարից ՝ ինտելեկտուալ առումով։

«Ես Արարատ Միրզոյանի տեղը գլուխ կգովայի, որ մեր երկրում «կվադրոբերներ» չկան»,- ասաց հոգեբանը։

Գիտնական-հոգեբան Միհրդատ Մադաթյանը, ԼՈւՐԵՐ.com –ի հետ իր զրույցում խոսելով «կվադրոբերների» մասին, նշեց՝ այս երևույթը իրենից ներկայացնում է էվոլուցիային հակառակ պրոցես՝ մարդը, որպես բանական արարած, հետ է գնում և դառնում է կենդանի։

Հարցին՝ ո՞ր տարիքային խմբում է նկատվում այս երևույթը՝ Մադաթյանը պատասխանեց, որ հիմնականում անցումային տարիքում՝ 10-14 տարեկան դեռահասների մոտ։ Դա, նրա խոսքով, ինքնակայացման խնդիրն է։

Ըստ Մադաթյանի՝ սա գլոբալիստական հերթական ծրագիր է, որն ի սկզբանե նպատակ է ունեցել շեղել դեռահասներին ճիշտ զարգացման ուղղուց՝ օգտվելով նրանց ըմբոստությունից։ Հիմա ավելի վատ պրոցես է տեղի ունենում՝ դեռահասները շեղվում են բանական մարդ դառնալու ճանապարհից։

«Այն էվոլուցիան, որը մենք ապրել ենք, ըստ Դարվինի՝ կապիկից դարձել ենք մարդ, աշխատելու շնորհիվ և այլն, հիմա դեգրադացվում ենք, այսինքն մինչև 10 տարեկան երեխան լինում է մարդ, մաթեմատիկա է սովորում, հետո դառնում շուն և վերջ, կյանքը վերջացավ»։

Մադաթյանի խոսքով՝ վիճակագրությունը ցույց է տալիս, որ դրսում տարածված ենթամշակույթները Հայաստանում էդպիսի լայն տարածում չեն ունենում, ինչպես օրինակ՝ Ռուսաստանում կամ Եվրոպայում։ Այնուամենայնիվ, Հայաստանում այս երևույթի տարածումը կանխելու համար պետք է «գովազդը» դադարեցվի, և, եթե ուշադրություն չդարձնենք, սաղմնային փուլում թողնենք, կվերանա, կգնա։

Հոգեբանը խորհուրդ է տալիս՝ քանի դեռ Հայաստանում այս գլոբալիստական ծրագիրը լայն տարածում չի գտել, «օվերտոնի պատուհանը» չբացել ու լայն տարածում չտալ։

ՄԱՆՐԱՄԱՍԵՐԸ՝ ՏԵՍԱՆՅՈՒԹՈՒՄ