Քրեական վարույթների հեռանկարը կարող է ազդել քաղաքական ուժերի որոշումների վրա. ովքեր կմասնակցեն Գյումրիի արտահերթ ընտրություններին

 Գյումրիի ավագանու խմբակցություններից արտահերթ ընտրությունների մասնակցության որոշումն ունեն միայն ՔՊ-ն և «Ապրելու երկիրը»

«Պատիվ ունեմ» խմբակցության ղեկավար Հայկ Մամիջանյանը «Փաստինֆոյի» հետ զրույցում ասաց, որ ՀՀԿ-ում դեռևս չի քննարկվել արտահերթ ընտրություններին մասնակցության հարցը։

Դիտարկմանը, թե արդյոք կուսակցության որոշման վրա ազդելու է այն, որ երբ որևէ համայնքում հաղթում է ոչ ՔՊ-ն՝ այդ կուսակցության կամ դաշինքի անդամների նկատմամբ քրեական գործեր են հարուցում՝ Մամիջանյանը պատասխանեց, որ նախ որոշումները կայացվում են ներկուսակցական քննարկման արդյունքում, երկրորդ՝ հարցը կարելի է հայելային փոխել։

«Կա երաշխիք, որ հենց այդպես էլ կլինի, օրինակը Վանաձորն է, որտեղ ամենակոշտ տարբերակով իշխանությունը վարվեց մեր կուսակցության անդամ Մամիկոն Ասլանյանի հետ, ով հաղթել էր ընտրություններում և գրեթե 3 տարի անցկացրեց անազատության մեջ։ Նույն պատմությունը Գյումրիում է՝ որոշ ելևէջների փոփոխությամբ։ Իսկ Երևան քաղաքի քաղաքապետն այս պահին ունի Երևանցիների 9 տոկոսի աջակցությունը։

Ամենահետաքրքրականն այստեղ այն է, որ ԱԺ-ում վերջերս Ալեն Սիմոնյանը քաղաքական ուժերից մեկի վարկանիշը փորձում էր համեմատել Վարդան Ղուկասյանի կուսակցության վարկանիշի հետ, բայց Ալեն Սիմոնյանին պետք է հիշեցնել, որ իրենք Երևանում իշխանությունը վերցրել են հենց Վարդան Ղուկասյանի ֆրակցիայի ձայների արդյունքում։ Հետևաբար, նման համեմատություններ անելուց պետք է զգույշ լինեն։ Այո, կա երաշխիք, որ հենց այդպես էլ կլինի, դա է հուշում հանրապետության 3 խոշորագույն քաղաքների՝ Վանաձորի, Երևանի, Գյումրիի դեպքերը, բազմաթիվ նման օրինակներ կան՝ մեծ ու փոքր այլ քաղաքներում»,- նշեց գործիչը։

Մամիջանյանն ընդգծեց, որ Հայաստանում ՏԻՄ ինքնավարությունը և անկախությունը անընդհատ հարվածներ է ստանում Փաշինյանի վարչախմբից։

Հարցին, թե սա ազդելո՞ւ մասնակցության վերաբերյալ որոշման վրա՝ նա ընդգծեց, որ ակնհայտ է, որ բոլոր գործոններն ազդելու են, այդ թվում՝ դա։

«Հայաստան» խմբակցության պատգամավոր Գեղամ Մանուկյանը ՀՅԴ-ի մասնակցության վերաբերյալ ասաց որ դեռ վաղ է այդ մասին խոսել։

Դիտարկմանը, թե կա՞ երաշխիք, որ եթե այլ ուժ հաղթի Գյումրիում, ապա նոր քրեակա գործեր չեն հայտնվի, կամ հները չեն վերաբացվի՝ նա նշեց, որ քաղաքական, քաղաքացիական երաշխիքները այնքան են իջել շրիշակից ներևէ, որ որևէ երաշխիք որևէ մեկը չիչ կարող տալ։ «Դուք չեք կարող երաշխիք տա, որ օպերատիվ տվյալների հիման վրա ապօրինի զենք պահելու կասկածանքով ձեզ չեն ձերբակալի։ Ինչ մնում է ՏԻՄ կատարված իրադարձություններին , որ տեղի են ունեցել Նիկոլ Փաշինյանի իշխանության օրոք՝ դա արդեն ոչ թե հակաժողովրդավարական են, այլ ամբողջությամբ քրեական հացագործությունների շարք է, որը ժողովրդավարական բաստիոն հռչակած և այդ քարոզչությունն իրականացնոց միջազգային կառույցները, դեսպանատներ)ը աչք են փակում։ իսկ Հայաստանում այդպես էլ ՏԻՄ նորմալ գործունեությունը բռնաբարված է այս իշխանությունների կողմից։ Այդ քրեական գործերը, տարիներով կալանքները , որ կան՝ այլանդակություն են»։

Իսկ արդյոք այդ իրավիճակը կարող է ազդել կուսակցությունների և ուժերի՝ արտահերթին մասնակցելու որոշման վրա՝ նա պատասխանեց, որ, բնականաբար, բոլոր գործոնները քննարկելուց հետո է, որ որոշում են կայացնելու մասնակցության վերաբերյալ այդ թվում՝ դա։