Ադրբեջանն ու Հայաստանը մոտ են խաղաղության պայմանագրի տեքստի շուրջ վերջնական համաձայնությանը. Ալիևը՝ Շոլցին

Նոյեմբերի 9-ին Գերմանիայի կանցլեր Օլաֆ Շոլցը զանգահարել է Ադրբեջանի նախագահ Իլհամ Ալիևին։

Այս մասին հաղորդում են ադրբեջանական ԶԼՄ–ները՝ հղում անելով Ադրբեջանի ղեկավարի մամուլի ծառայությանը։

Հեռախոսազրույցի ընթացքում կանցլեր Օլաֆ Շոլցն ափսոսանքով նշել է, որ Գերմանիայում ստեղծված քաղաքական իրավիճակի պատճառով չի կարողանա մասնակցել Ադրբեջանում անցկացվող COP29 գագաթնաժողովին։ 

Նշելով, որ Գերմանիան աջակցում է Ադրբեջանի և Հայաստանի միջև խաղաղության ու բարիդրացիական հարաբերությունների հաստատմանը, կանցլեր Օլաֆ Շոլցն այս համատեքստում հայտարարել է, որ իր երկիրը կողմերին կոչ է անում համարձակ քայլեր ձեռնարկել։

Ալիևն իր հերթին պնդել է, թե իբր «Ադրբեջանի նկատմամբ Հայաստանի Սահմանադրությամբ ամրագրված տարածքային պահանջները դեռևս պահպանվում են»։ Նա նշել է, թե «Հայաստանի կողմից փաստաթղթի տեքստի վերաբերյալ առաջարկների նշանակալից ձգձգումը բացասաբար է ազդել գործընթացի վրա», սակայն, չնայած դրան, կողմերը մոտ են փաստաթղթի տեքստի շուրջ վերջնական համաձայնության գալուն, և բանակցությունները կշարունակվեն COP29-ի ավարտից հետո։