«Ժամանակի իզուր վատնում». համաշխարհային առաջնորդները հրաժարվում են մասնակցել Բաքվի COP29-ին

12 Նոյեմբեր, 2024 0:07

Euronews-ը ծավալուն հոդվածում ներկայացնում է, թե որ պետությունների ղեկավարները չեն մասնակցի Բաքվում անցկացվող COP29-ին։ «Այս տարվա կլիմայի միջազգային համաժողովը շատ ավելի համեստ կլինի, քան նախորդ տարվա Դուբայում կայացածը։

Հաջորդ շաբաթ աշխարհի առաջնորդները, բանակցողները, լոբբիստները և ոչ կառավարական կազմակերպությունների ներկայացուցիչներ կհավաքվեն Ադրբեջանի մայրաքաղաք Բաքվում՝ մասնակցելու COP29 համաժողովին։

ՄԱԿ-ի կլիմայի համաժողովը կոչվում է «ֆինանսական համաժողով», քանի որ ակնկալվում է, որ այս տարի երկրները կսահմանեն կլիմայի ֆինանսավորման նոր թիրախ: Հաջորդ տարի Բրազիլիայում կայանալիք COP30-ից առաջ, դրանք նաև պայմանավորված են կլիմայական ներկա ազգային պարտավորություններով, որոնք հայտնի են որպես «Ազգային որոշված ներդրումներ» (NDCs):

ՄԱԿ-ի տվյալներով՝ ավելի քան 100 պետությունների և կառավարությունների ղեկավարներ հաստատել են իրենց մասնակցությունը համաժողովին։

Սակայն աշխարհի մի շարք առաջնորդներ ու պետական պաշտոնյաներ արդեն հայտարարել են, որ չեն մեկնելու Բաքու։ Մենք ներկայացնում ենք, թե ով չի գնա և ինչու:
ԵՄ ո՞ր առաջնորդը չի մասնակցի COP29-ին:
Վերջին մի քանի շաբաթների ընթացքում մի շարք եվրոպական առաջնորդներ հայտարարեցին, որ չեն մասնակցի COP29-ին:

Այս շաբաթվա սկզբին Եվրահանձնաժողովի նախագահի խոսնակը Euronews-ին հաստատեց, որ Ուրսուլա ֆոն դեր Լեյենը չի մասնակցի համաժողովին:

Ֆոն դեր Լեյենի ներկայացուցչի խոսքով՝ քանի որ Եվրահանձնաժողովը գտնվում է անցումային փուլում, «նախագահը կկենտրոնանա իր ինստիտուցիոնալ պարտականությունների վրա»։ Ուրսուլա ֆոն դեր Լեյենի երկրորդ ժամկետը ԵՀ-ի ղեկավարի պաշտոնում սկսվում է դեկտեմբերի 1-ին։

Փոխարենը ԵՄ-ն կներկայացնեն Եվրոպական խորհրդի նախագահ Շառլ Միշելը, ինչպես նաև եվրահանձնակատարներ Վոպկե Հոկստրան (կլիմայի հարցերով) և Կադրի Սիմսոնը (էներգետիկ):
Ֆրանսիայի նախագահ Էմանուել Մակրոնը նույնպես բաց կթողնի կլիմայական գագաթնաժողովը, ըստ տեղեկությունների՝ դրա անսկացնելու վայրի պատճառով: Ֆրանսիայի հարաբերություններն Ադրբեջանի հետ սրվել են անցյալ տարվանից, երբ Փարիզը դատապարտեց Բաքվի գործողությունները Ղարաբաղում։

Գերմանիայի կանցլեր Օլաֆ Շոլցը հայտարարել է, որ չի մասնակցելու COP29-ին՝ ներքաղաքական խնդիրների պատճառով։ Չորեքշաբթի օրը Գերմանիայում փլուզվեց իշխող կոալիցիան։ Նա ծրագրել էր Բաքվում մասնակցել կլիմայի գագաթնաժողովին, սակայն ստիպված եղավ չեղարկել ուղևորությունը։

Բրազիլիա, Մեծ Բրիտանիա, Ռուսաստան... Էլ ո՞վ չի գա Բաքու.
Քանի որ COP29-ը տեղի կունենա ԱՄՆ ընտրություններից մի քանի օր անց, նախագահ Ջո Բայդենը նույնպես չի մասնակցի համաժողովին: Նա երկրորդ տարին անընդմեջ բաց է թողնում կլիմայի վերաբերյալ գլոբալ բանակցությունները: ԱՄՆ պատվիրակությունը կգլխավորի կլիմայի միջազգային քաղաքականության գծով նախագահի ներկայիս ավագ խորհրդական Ջոն Պոդեստան։

Բրազիլիայի նախագահ Լուիս Ինասիո Լուլա դա Սիլվան նույնպես չեղյալ է հայտարարել իր ուղևորությունը՝ անցյալ ամիս գլխի վնասվածք ստանալուց հետո: Հաջորդ տարի երկիրը կհյուրընկալի COP30-ը Բելեմում:

Չարլզ III թագավորը նույնպես չի մասնակցի գագաթնաժողովին, իսկ Մեծ Բրիտանիայի կառավարությունը որոշել է չուղարկել նրան որպես ներկայացուցիչ, քանի որ նա շարունակում է ապաքինվել հիվանդությունից: Թագավորը երկար ժամանակ եղել է կլիմայի փոփոխության ջատագով և մասնակցել է ՄԱԿ-ի նախկին համաժողովներին:

ՌԴ նախագահ Վլադիմիր Պուտինը չի գնա ՄԱԿ-ի կլիմայի համաժողովին, իսկ COP29-ում երկրի պատվիրակությունը կգլխավորի վարչապետ Միխայիլ Միշուստինը։ Հոկտեմբերին ԵՄ-ում Ուկրաինայի դեսպան Վսևոլոդ Չենցովը Politico-ին ասել էր, որ միջազգային հանրությունը պետք է դուրս գա գագաթնաժողովից, եթե Պուտինը մասնակցի:

Կանադայի վարչապետ Ջասթին Թրյուդոն, Հնդկաստանի վարչապետ Նարենդրա Մոդին, Չինաստանի նախագահ Սի Ցզինպինը, Հարավային Աֆրիկայի վարչապետ Սիրիլ Ռամաֆոսան և Ավստրալիայի վարչապետ Էնթոնի Ալբանեզը նույնպես բաց կթողնեն այս տարվա կլիմայի համաժողովը:

«Ժամանակի վատնում». Պապուա Նոր Գվինեայի մերժումը
Օգոստոսին Պապուա Նոր Գվինեայի վարչապետ Ջեյմս Մարապեն հայտարարեց, որ երկիրը չի մասնակցի COP29-ին՝ ի նշան բողոքի խոշոր երկրներից «կլիմայի փոփոխության զոհերին արագ աջակցության» բացակայության դեմ: Մարապեն ասաց, որ դա անում է բոլոր փոքր կղզի պետությունների շահերից ելնելով:

Շրջապատված օվկիանոսով և ունենալով մոլորակի երրորդ ամենամեծ տարածքը արևադարձային անտառներով՝ Պապուա Նոր Գվինեան չափազանց խոցելի է կլիմայի փոփոխության հետևանքների նկատմամբ: Այն տուժում է ծովի մակարդակի բարձրացումից և բնական աղետներից»,-ասվում է հոդվածում։