Երբ Փաշինյանն առավոտյան 7-ին հեծանիվ է քշում, ինչ-որ մեկիդ խանգարո՞ւմ է․ Հրաչյա Հակոբյան (տեսանյութ)

«Երբ Նիկոլ Փաշինյանն առավոտյան 7-ին հեծանիվ է քշում, ինչ-որ մեկիդ խանգարո՞ւմ է»,– լրագրողների հետ զրույցում անդրադառնալով այն քննադատություններին, թե երկրի գործերը թողած՝ Փաշինյանն ու կինը հեծանիվ են վարում, ասաց ՔՊ-ական պատգամավոր, Աննա Հակոբյանի եղբայր Հրաչյա Հակոբյանը։

«Ո՞ւմ է խանգարում առավոտյան ժամը 6-ին հեծանիվ քշելը։ Պատկերացնու՞մ եք, մարդիկ հաց էլ են ուտում»,- նորից կրկնեց պատգամավորը։

Լրագրողների նկատառմանը, թե Ալիևն անվտանգային հարցերով է զբաղված, իսկ Փաշինյանը հեծանիվ է քշում, Հակոբյանն արձագանքեց. «Փաշինյանը հեծանիվ քշում է ոչ աշխատանքային ժամին։ Իսկ աշխատանքային ժամին, մի՛ անհանգստացեք, զբաղվում է և՛ անվտանգային հարցերով, և՛ շատ ու շատ այլ հարցերով»։

Դիտարկմանը, թե պատերազմի սպառնալիքի ֆոնին թշնամին հզորանում ու զորավարժություններ է անում, իսկ ՀՀ-ում ոչ մի գործընթաց չի կատարվում, պատգամավորը պատասխանեց․ «Այն, որ մենք Հնդկաստանից զենք ենք ձեռք բերում, դա չեք տեսնում, բայց որ Ադրբեջանի ղեկավարն ասել է, որ Հայաստանը պետք է այս ինչը անի կամ չանի, դուք հենց դրա մասին եք առավոտից երեկո խոսում»։