ՀՀ ԱԺ–ն պարտավոր է վերաբերմունք արտահայտել գերիների նկատմամբ իրականացվող գործողությունների վերաբերյալ․ Արծվիկ Մինասյան

Ազգային Ժողովն այսօր՝ նոյեմբերի 12-ին, կքննարկի Ադրբեջանում պահվող հայ ռազմագերիների հարցը։ Նախագիծը խորհրդարան է բերել ընդդիմադիր 30 պատգամավոր։ 

«Հայաստան» խմբակցության քարտուղար Արծվիկ Մինասյանը այսօր հայտնել է, որ պատգամավորների ¼–ի նախաձեռնությամբ կքննարկվի Բաքվում պահվող հայ ռազմագերիների հարցը։ 

«Կարծում ենք, որ քաղաքական մեծամասնությունը և ներկա գտնվող կառավարությունն իրենց հստակ վերաբերմունքը պետք է արտահայտեն Ադրբեջանի կողմից իրականացվող այս հակամարդկային արարքի վերաբերյալ։ Սա շատ լավ առիթ է, որ Բաքվում նախաձեռնված COP–29–ի շրջանակում հայ ժողովրդի բարձրագույն ներկայացուցչական մարմինը պահանջ ու ուղերձ հղի միջազգային հանրությանը»,– ասել է Արծվիկ Մինասյանը` հավելելով, որ նախատեսվում է նաև հայտարարության քվեարկություն։

Ըստ պատգամավորների՝ ՄԱԿ-ի «Կլիմայի փոփոխության մասին շրջանակային կոնվենցիայի» մասնակիցների կոնֆերանսի 29-րդ նստաշրջանի (COP29) անցկացմանը զուգընթաց Հայաստանի Ազգային ժողովը պարտավոր է վերաբերմունք արտահայտել գերիների նկատմամբ իրականացվող գործողությունների վերաբերյալ։