«Ավինյանը մի ձեռքով պաշտոնանկ արեց, մյուսով պաշտոն տվեց»
Քաղաքական
Աջափնյակի արդեն նախկին թաղապետ Կամսար Բաբինյանը 3 օր է, ինչ պաշտոնանկությունից անմիջապես հետո ղեկավարում է թիվ 19 պոլիկլինիկան։
Պաշտոնից զրկվելուց հետո այս նշանակումը հատկանշական է նրանով, որ, ըստ մամուլում տարածվող տեղեկությունների, Կամսար Բաբինյանն իրականում դարձել է ՔՊ-ի ներսում ներքին խարդավանքների զոհ՝ հայտնվելով Փաշինյան-Ավինյան լուռ հակամարտության թիրախում։
Դեռ մեկ ամիս առաջ մամուլը գրել էր, որ ըստ իրենց ՔՊ աղբյուրների՝ Փաշինյանը նոր թափով էր տրամադրվել Ավինյանի դեմ։
«Փաշինյանին հունից հանել է Ավինյանի մի կողմ քաշված վիճակը, իբր ոչ ՔՊ-ից է, ոչ էլ երբևիցե եղել է»,- նշել էին նրանք։
Չընդդիմանալով վարչապետին՝ Տիգրան Ավինյանը որոշել է բոլոր վարչական շրջաններում ազատվել ոչ ՔՊ-ական ղեկավարներից և նրանց փոխարեն կուսակցականների նշանակել, որ ավելի վստահելի լինեն՝ դրան զուգահեռ ոչ կուսակցական Կամսար Բաբինյանին նշանակելով թիվ 19 պոլիկլինիկայի տնօրեն։
Հիշեցնենք՝ նախկին քաղաքապետ Տարոն Մարգարյանի օրոք Բաբինյանը եղել է Երևանի քաղաքապետարանի առողջապահության վարչության պետը, բայց 2018 թվականի իշխանափոխությունից հետո կտրուկ հեղափոխվել և անցել է «հեղափոխականների» կողմը՝ թեև չդառնալով կուսակցական։
ՄԱՐԻՆԵ ԱՌԱՔԵԼՅԱՆ
Ամենադիտված 
Մնաս բարյավ. Րաֆֆի Հովհաննիսյան
