Ռուսաստանն ու Իրանը տարբեր շահեր ունեն Հարավային Կովկասում. ՀՀ-ում Իրանի դեսպան

Հայաստանում Իրանի դեսպան Մեհդի Սոբհանին New York Times-ին տված հարցազրույցում հայտարարել է, որ Ռուսաստանն ու Իրանը Հարավային Կովկասում տարբեր շահեր ունեն։

«Մենք ունենք որոշակի տարբերություններ և որոշակի ընդհանուր շահեր։ Սա չի նշանակում, որ մենք դաշնակիցներ ենք»,-ասել է Սոբհանին։

«Կոնֆլիկտներով լի կովկասյան տարածաշրջանում Ռուսաստանն ու Իրանը տարբեր տեսակետներ ունեն առևտրային ուղիների և ազդեցության վերաբերյալ»,- գրում է ամերիկյան հրատարակությունը՝ հավելելով, որ դա անսովոր երկընտրանք է ստեղծում արևմտյան երկրների համար։

«Իրանցիներն այս տարածաշրջանում հայերի լավագույն բարեկամներն են»,- ասել է Հայաստանում Եվրոպական միության դիտորդական առաքելության ղեկավար Մարկուս Ռիտերը՝ հավելելով, որ ադրբեջանցիներն ու ռուսները դժգոհ են եվրոպական ներկայությունից, մինչդեռ Իրանը կարծես թե ընդունում է այն։

«Մենք չենք կարող ընդունել փոփոխություններ միջազգային սահմաններում»,- ամերիկյան հրատարակությանը տված հազվագյուտ հարցազրույցում ասել է Հայաստանում Իրանի դեսպան Մեհդի Սոբհանին։

Միաժամանակ, Սոբհանին խուսափել է հստակեցնել, թե ինչ կանի Թեհրանը, եթե Ադրբեջանը հարձակվի։ «Դա չի լինի», - ասել է նա:

«Հայաստանում վախենում են, որ Թրամփի նախագահության օրոք Իրանի նկատմամբ ամերիկյան ավելի կոշտ քաղաքականությունը հարված կհասցնի իրենց երկրին և կամրապնդի Ադրբեջանը։ Նրանք նաև մտավախություն ունեն, որ Հայաստանին պաշտպանելու Թեհրանի կարողունակությունը կարող է թուլանալ, եթե Իրանի և Իսրայելի միջև ներկայիս հակամարտությունը վերաճի լայնածավալ պատերազմի:

Հայաստանի սահմանները հսկող եվրոպական առաքելության ղեկավար Մարկուս Ռիտերն իր հերթին նշել է, որ և՛ Հայաստանը, և՛ Ադրբեջանն այժմ բունկերներ են կառուցում, խրամատներ և հրետանային դիրքեր են փորում, որպեսզի պատրաստ լինեն վատագույն սցենարին։

«Իրանի հետ Հայաստանի նեղ սահմանի երկայնքով, Ադրբեջանից մոտ 10 մղոն հեռավորության վրա, գտնվում է այժմ լքված խորհրդային ժամանակաշրջանի Մեղրիի կայարանը, որտեղ ժանգոտվող գնացքի վագոնները հազիվ են երևում մոլախոտերի մեջ», - նշում է New York Times-ը՝ ամփոփելով, որ «երկաթուղին «մեր» Կովկասի խորհրդանիշն էր խորհրդային տարիներին և հիշեցնում է մեզ այս տարածքի կարևորության մասին մինչ օրս»: