Ռուստամ Բադասյանի ՊԵԿ-ի կադրերը կտեղափոխվեն Արդարադատության նախարարություն. ընկերական բարտեր՝ «ես՝ քեզ, դու՝ ինձ» սկզբունքով. 168.am

Արդարադատության նախարար Սրբուհի Գալյանն արդեն կողմնորոշվում է իր կադրային քաղաքականության հարցում, կամ ավելի ճիշտ՝ նրան թերևս օգնում են կողմնորոշվել:

Այսպես՝ 168.am-ի հավաստի տեղեկություններով՝ նորանշանակ նախարարը որոշել է իր թիմը համալրել Պետական եկամուտների կոմիտեի (ՊԵԿ) կադրերով: Նախ Սրբուհի Գալյանը պատրաստվում է նախարարի խորհրդականի պաշտոնում նշանակել ՊԵԿ նախագահի ներկայիս խորհրդական Ներսես Զեյնալյանին:

Բացի Ներսես Զեյնալյանից, Սրբուհի Գալյանն իր տեղակալի պաշտոնում ցանկանում է Նիկոլ Փաշինյանին առաջարկել նաև ՊԵԿ իրավաբանական վարչության պետի տեղակալ Պետիկ Մկրտչյանի թեկնածությունը: Պետիկ Մկրտչյանն էլ իր հերթին, մեր տեղեկություններով, ՊԵԿ-ում հայտարարել է, որ շուտով համակարգելու է իր սիրելի և հոգեհարազատ քրեական դատավարության ոլորտը:

Ուշագրավ է, որ, մեր աղբյուրի փոխանցմամբ՝ Պետիկ Մկրտչյանը ոչ միայն Արդարադատության ակադեմիայի ռեկտոր Սերգեյ Առաքելյանի մտերիմն ու սիրելին է, այլև բավականին լարված հարաբերություններ ունի Մարդու իրավունքների պաշտպան (ՄԻՊ) Անահիտ Մանասյանի և Գլխավոր դատախազ Աննա Վարդապետյանի հետ: Գուցե հենց այդ պատճառով էլ Գալյանը դիտարկում է նրա թեկնածությունն իր տեղակալի պաշտոնում:

ՊԵԿ-ի հետ առնչվող փաստաբանները, ի դեպ, ասում են, որ Պետիկ Մկրտչյանը կամայականորեն է մեկնաբանում քրեադատավարական օրենսդրությունը և ՊԵԿ ղեկավարության քիմքին հաճո, հաճախ օրենքի տեսանկյունից խնդրահարույց լուծումներ գտնում: Այս հարցին կանդրադառնաք այլ առիթով:

Իսկ պատահակա՞ն է արդյոք ՊԵԿ-ի կադրերի տեղափոխումն Արդարադատության նախարարություն: Իհարկե, ոչ: Բանն այն է, որ Սրբուհի Գալյանի լոբբինգով «Քաղաքացիական պայմանագիր» (ՔՊ) կուսակցության վարչությունում զբաղվել է Տիգրան Ավինյանը՝ Ռուստամ Բադասյանի խնդրանքով: Իր կադրերին Արդարադատության նախարարությունում տեղավորելով՝ Ռուստամ Բադասյանը, բնականաբար, ցանկանում է ամրապնդել իր դիրքերն իրավական ոլորտում: Իսկ Սրբուհի Գալյանն էլ, իհարկե, չի կարող հրաժարվել իր պաշտոնեական առաջխաղացումն ապահովող մարդկանց առաջարկն ընդունելուց:

Հատկանշական է, որ արդարադատության փոխնախարարի պաշտոնում Գալյանը Բադասյանի հորդոր-պահանջով հենց բանակում չծառայած Պետիկ Մկրտչյանի թեկնածությունն է առաջադրելու: Նա այն պաշտոնյան է, ով անձամբ ակտիվորեն զբաղվել է տնտեսական հանցագործությունների վերաբերյալ հանցակազմերից խրախուսական նորմերը հանելով՝ ՔՊ-ի համար անցանկալի գործարարներին անխուսափելիորեն քրեական պատասխանատվության ենթարկելու համար:

Հետաքրքիր է՝ այս հանգամանքների առնչությամբ ի՞նչ են մտածում ՔՊ-ում, և ի՞նչ դիրքորոշում ունի Նիկոլ Փաշինյանի աշխատակազմի ղեկավար Արայիկ Հարությունյանը, ով էլ հենց զբաղվում է փոխնախարարների հարցերով:

Հավելենք նաև, որ փոխնախարարների պաշտոնն արդեն իսկ քաղաքական պաշտոն է, և ուրեմն նրանց նշանակումները պետք է համաձայնեցվեն նաև Նիկոլ Փաշինյանի հետ: