ԱՄՆ-ում տղամարդը կեղծել է իր մահը՝ կնոջից ու երեխաներից փախչելու համար

ԱՄՆ-ում տղամարդը կեղծել է իր մահը, լքել ընտանիքին և հավանաբար փախել Ուզբեկստան, հայտնում է The Guardian-ը։

Հաղորդվում է, որ 2024 թվականի օգոստոսի 12-ին 45-ամյա Ռայան Բորգվարթը կորել է Գրին լեյքում ձկնորսության ժամանակ։ Ոստիկանները հայտնաբերել են նրա շրջված նավակը, բաճկոնը, դրամապանակը, մեքենայի բանալիներն ու ձկնորսական կարթը:

Փրկարարները տղամարդու մարմինը որոնել են ավելի քան մեկ ամիս, սակայն հետաքննության ընթացքում պարզվել է, որ տղամարդն անհետանալուց առաջ իր կյանքն ապահովագրել է 375 հազար դոլարով։ Նա նաև նոր անձնագիր է ստացել հունվարին՝ կյանքի ապահովագրության պայմանագիր կնքելուց հետո՝ հայտարարելով, թե կորցրել է հին անձնագիրը:

Տղամարդը փորձել է գումար փոխանցել արտասահմանյան բանկային հաշվին, ինչպես նաև մաքրել է ինտերնետ–բրաուզերը անհետանալուց մեկ օր առաջ: Հոկտեմբերին կանադացի հետախույզները պարզել են, որ նա հատել է սահմանն իր անհետացման հաջորդ օրը։

Բացի այդ, պարզվել է՝ ամերիկացին համացանցում նամակագրական կապի մեջ է եղել Ուզբեկստանից մի կնոջ հետ։ Ոստիկանության տվյալներով՝ տղամարդը փախել է Կենտրոնական Ասիա՝ նրա մոտ։