Հակակոռուպցիոն, Քննչական կոմիտեները և մի շարք մարմիններ ԱԺ-ում հաշվետվություն կներկայացնեն

Քննարկվող օրենսդրական նախաձեռնությամբ առաջարկվում է, որ Հակակոռուպցիոն, Քննչական կոմիտեների, ՊԵԿ-ի, Տնտեսական մրցակցության պաշտպանության, Հանրային ծառայությունները կարգավորող եւ Կոռուպցիայի կանխարգելման հանձնաժողովի նախագահները տարեկան մեկ անգամ Ազգային ժողովում ներկայացնեն նախորդ տարվա իրենց գործունեության տարեկան հաշվետվությունները: Այս մասին ասել է ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ, նախագծի համահեղինակ Սիսակ Գաբրիելյանը:

Ըստ ԱԺ լրատվականի՝ պատգամավորներ Սիսակ Գաբրիելյանի, Արսեն Թորոսյանի, Ալեն Սիմոնյանի եւ Արուսյակ Ջուլհակյանի հեղինակած ««Ազգային ժողովի կանոնակարգ» սահմանադրական օրենքում լրացումներ կատարելու մասին» եւ կից ներկայացված օրենքների նախագծերի փաթեթն առաջին ընթերցմամբ քննարկվել է ԱԺ նոյեմբերի 15-ի հերթական նիստում:

«Թվարկված մարմինները, ըստ էության, դուրս էին խորհրդարանական ձեւաչափով վերահսկողության դաշտից»,- նշել է հանձնաժողովի նախագահը: Նրա խոսքով այդպիսի հանդիպումները սպասված են հասարակության կողմից: Նշված մարմինների ղեկավարները նույնպես ցանկություն են հայտնել այդ ձեւաչափով հանդես գալ` նշելով, որ այն լավ հնարավորություն է` ներկայացնելու իրենց կատարած աշխատանքներն ու լսելու խորհրդարանականների առաջարկությունները, հարցերն ու քննադատությունները:

Նախագծով ամեն տարի` գարնանային նստաշրջանից մինչեւ ամառային արձակուրդների հատվածը, նշված մարմինների ղեկավարները կներկայացնեն իրենց գործունեության տարեկան հաշվետվությունները: Սիսակ Գաբրիելյանը հավելել է, որ խորհրդարանական ընդդիմությունն առաջարկվող նախագծին հանձնաժողովում միաձայն կողմ է քվեարկել:

Հարակից զեկուցող, Պետական-իրավական հարցերի մշտական հանձնաժողովի անդամ Լիլիթ Մինասյանը ներկայացրել է գլխադասային հանձնաժողովի դրական եզրակացությունն օրենսդրական նախաձեռնության վերաբերյալ: Նա նշել է, որ Կառավարություն-Ազգային ժողով հարցուպատասխանի ձեւաչափում նշված մարմինները ներկայացվածություն չունեն, եւ այս նախաձեռնությունը միտված է հանրային դաշտում տվյալ մարմինների գործունեության թափանցիկության ապահովմանը:

Հարակից զեկուցող, Արդարադատության նախարարի տեղակալի ժամանակավոր պաշտոնակատար Արմենուհի Հարությունյանի խոսքով նախագծերի փաթեթը միտված է հաշվետվողականության բարձրացմանը: Կառավարությունը ներկայացրել է դրական եզրակացություն օրենսդրական նախաձեռնության վերաբերյալ: