Կարեն Անդրեասյանի նախագահության ժամանակ ԲԴԽ-ն վերածվել է սովորական ՔՊ կուսակցության իրավաբանական գրասենյակի․ Էդգար Ղազարյան

Կարեն Անդրեասյանը չի հեռացել հրաժարականով, Նիկոլ Փաշինյանն է պահանջել նրա հրաժարականը՝ ԲԴԽ նախագահի պաշտոնից։ Կարեն Անդրեասյանի ղեկավարության ժամանակ ԲԴԽ-ն վերածվել է սովորական քաղաքացիական պայմանագիր կուսակցության իրավաբանական գրասենյակի։ Նա խոչընդոտել է դատական համակարգի անկախ գործունեությանը, և այն դարձրել է քաղաքական որոշումների իրագործման հաստատություն, որն էլ իր հերթին նշանակում է, որ նա մեր դատական համակարգը մտցրել է խորը ճգնաժամի մեջ։ Այս համոզմունքին է Սահմանադրական դատարանի աշխատակազմի նախկին ղեկավար, հանրային գործիչ Էդգար Ղազարյանը։

«Փաշինյանի որոշումը վկայում է այն մասին, որ դատական բարձրագույն խորհուրդ, որպես անկախ սահմանադրական մարմին՝ գոյություն չի ունեցել։ Չնայած մինչև Կարեն Անդրեասյանի նշանակվելն էլ գոյություն չուներ, որովհետև այն ժամանակ էլ ղեկավարում էր Նիկոլ Փաշինյանի մեկ այլ թիմակից Դավիթ Ջհանգիրյանը, ով այդ պաշտոնը ստանձնել էր ապօրինաբար։ Հիշեք՝ Կարեն Անդրեասյանը եղել է Նիկոլ Փաշինյանի թիմակիցներից, ով նաև ներշնչվում էր Փաշինյանի լուսանկարներով։ Մի բան էլ․․․ նա ունի ՝ անհաջող կերպար լինելու և գործունեության սեփական ինքնագնահատական, որովհետև նա Պետրոս Ղազարյանի տված հարցազրույցում ասել է, որ շաբաթը 4 օր մտածում է հրաժարականի մասին, այստեղից կարող ենք հասկանալ որ երկուշաբթի գնում էր աշխատանքի հասկանում էր, որ դա իր տեղը չէ և 4 օր մտածել է հրաժարականի մասին․ դա մաքուր ինքնագնահատական է՝ իր անպիտան լինելու մասին»,-ասում է Ղազարյանը։

Նրա խոսքով՝ Կարեն Անդրեասյանը բոլոր հանձնարարականները կատարում էր անխոնջ, բայց կատարում էր նաև անորակ, որովհետև եթե Նիկոլ Փաշինյանը որոշում է կայացնում՝ ինչ-որ մեկը պիտի հայտնվի բանտում, ուրեմն դատավարության օրենսդրությունը պետք է դրվեր մի կողմ և նրա որոշումը պետք է կատարվեր կայծակնային արագությամբ, իսկ եթե 1 վայրկյան ուշացնում էին, ուրեմն չէին համապատասխանում նրա գործունեությանը։ Էդգար Ղազարյանը նորից կատակում է՝ իր համակուրսեցուն հիշելով այդ պաշտոնում, ասում է, տեսնում եմ միայն Արփի Դավոյանին՝ որպես արժանավորի։ Արդյո՞ք նախկին գլխավոր դատախազի օրինակով փորձ կանեն Փաշինյանի երեկվա հեռացրած պաշտոնյաները անցնել բարիկադներից այս կողմ։

«Նրանք, ովքեր հայտնվում են Փաշինյանի իշխանության համակարգում ոչ թե սորոսական են, այլ նիկոլական, իսկ դրանից վատ բնորոշում որևէ մարդու դժվար է պատկերացնել։ Ես չեմ պատկերացնում ավելի զզվելի ընդդիմադիր գործիչ, քան որ կար Կարեն Անդրեասյանը, Վահե Ղազարյանը կամ Արգիշտի Քյարամյանը։ Իմ կարծիքով՝ նրանք ընդդիմադիր դաշտում չպետք է տեղավորվեն, այլ պետք է տեղավորվեն Վարդաշեն քրեակատարողական հիմնարկում (բանտում)»,-եզրափափակեց Էդգար Ղազարյանը։