Դիտարկում ենք ԵՄ առաքելությունում մեր ներկայացուցիչների թվի ավելացման հարցը. Լեհաստանի նախագահ

Երկու շաբաթ առաջ առանձնազրույց ունեցա Ադրբեջանի նախագահ Ալիևի հետ, և մենք, ի թիվս այլ հարցերի, խոսեցինք Հայաստանի հետ հարաբերությունների մասին։ Այդ ժամանակ ես նախագահին ասացի, որ պաշտոնական այցով մեկնում եմ Հայաստան և խնդրեցի, որ իր տեսակետն արտահայտի այն կոնֆլիկտային հարցերի վերաբերյալ, որոնք վերջերս լուծվել են այստեղ։ Բարեբախտաբար, խաղաղ գործընթացն ու այս կոնֆլիկտային խնդրի հարցերի լուծումն առաջընթաց են ապրում։ Շատ դժվար է։ Դա դարավոր, կարելի է ասել, ադրբեջանցիների և հայերի հարաբերություններն է, մարդկանց ու տարբեր էթնիկ խմբերի բնակության վայրերի հարցերը։ Բայց այս խաղաղության գործընթացն առաջ է շարժվում։ Այս մասին Հայաստան կատարած պաշտոնական այցից հետո լրագրողների հետ զրույցում ասել է Լեհաստանի նախագահ Անջեյ Դուդան։

Նա նաև նշել է, որ դիտարկում են ԵՄ առաքելությունում Լեհաստանի ներկայացուցիչների թվի ավելացման հարցը։

«Համեմատելով այն, ինչ տեղի է ունեցել առաքելության ժամանումից առաջ կամ առաքելության ժամանման պահին, և այն, ինչ մենք այժմ ունենք, պարզ է, որ շատ վայրերում, որտեղ մենք գործ ենք ունեցել անընդհատ գնդակոծությունների հետ, առաջին հերթին՝ ենթակառուցվածքների ուղղությամբ, այդ կրակոցները դադարել են՝ այդ վայրեր ԵՄ ներկայացուցիչների մշտական ժամանման պատճառով: Այնպես որ, գոնե, այս տեսանկյունից կարելի է ասել, որ առաքելությունը հաջողվել է։

Մենք մասնակցում ենք այդ առաքելությանը և դիտարկում ենք այդ առաքելությունում մեր ներկայացուցիչների թվի ավելացման հարցը»,- ասել է Անջեյ Դուդան։