Ուղևորն առանց տոմսի նստել է ինքնաթիռ, թաքնվել զուգարանում ու թռել Փարիզ

Delta Air Lines ավիաընկերության ուղեւորն առանց տոմսի նստել է ինքնաթիռ, թաքնվել զուգարանում եւ ԱՄՆ-ից թռել Ֆրանսիա։ Այս մասին գրում է The New York Post-ը։

Չորեքշաբթի՝ նոյեմբերի 27-ին, աննախադեպ դեպք է տեղի ունեցել։ Հրատարակության տվյալներով՝ Նյու Յորքից Փարիզ թռչող կինը երկու անգամ խուսափել է Քենեդու անվան օդանավակայանում փաստաթղթերի ստուգումից։

Անձնակազմի նման անուշադրությունը բացատրվել է իրարանցումով և հսկայական հերթերով, որոնք նկատվել են ամերիկյան շատ նավահանգիստներում Գոհաբանության օրվա նախօրեին։

Մի քանի ժամ շարունակ իրավախախտին հաջողվել է թաքնվել Airbus A330-ի զուգարանում։ Օդանավակայանում վայրէջք կատարելուց առաջ անձնակազմի անդամները պարզել են, որ ինքնաթիռում տոմս չունեցող ուղևոր կա:

Փարիզ ժամանելուն պես կինը բերման է ենթարկվել։ Փոխադրողի ներկայացուցիչները խոստացել են ավիացիոն ոլորտի այլ շահագրգիռ կողմերի և իրավապահ մարմինների հետ համատեղ իրականացնել միջադեպի մանրակրկիտ հետաքննություն։