Քրիստոս մարդու կյանքում ներկա է, Քրիստոսի ներկայությունը փոխում է մարդու կյանքը. վարդապետ Զարգարյան

Արագածոտնի թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ, Ապարանի հոգևոր հովվության համայնքների երիտասարդաց միությունների անդամների համար բանախոսություն վարեց Մայր Աթոռ Սուրբ Էջմիածնի միաբան՝ Հոգեշնորհ Տեր Ռուբեն վարդապետ Զարգարյանը:
 

Հայր Սուրբը բանախոսության ընթացքում կարևորեց այն հանգամանքը, որ երիտասարդները գիտեն Եկեղեցու ճանապարհը, ապրում են այնտեղ և նշեց. «Երիտասարդ տարիքում բնական է սայթաքելը, բայց լավ կլինի, որ դա չլինի ճակատագրական և այս իմաստով կարևոր է, որ դուք գիտեք եկեղեցու ճանապարհը, ապրում եք այնտեղ»:

Շեշտեց, որ ուժեղ լինելու համար պիտի ունենաս քո ազգային առանձնահատկությունը, զարգացնես քոնը, նշեց նաև, որ Քրիստոս մարդու կյանքում ներկա է, անցյալ չէ։ Քրիստոսի ներկայությունը փոխում է մարդու կյանքը:

Հավարտ բանախոսության Հայր Սուրբը պատասխանեց երիտասարդներին հետաքրքրող հարցերին:
 

Հանդիպմանը ներկա էին՝ Ապարանի հովվության հոգևոր հովիվներ՝ Արժանապատիվ Տեր Մուշե քահանա Վահանյանը, Տեր Սարգիս քահանա Սարգսյանը, Տեր Հայկ քահանա Քոչարյանը, Արագածոտնի թեմի երիտասարդաց միությունների հոգևոր պատասխանատու Արժանապատիվ Տեր Փառեն քահանա Առաքելյանը, Ապարանի հովվության համայնքների 6 երիտասարդաց միությունների շուրջ 100 անդամներ:
 

Երիտասարդաց միությունների հոգևոր պատասխանատու Արժանապատիվ Տեր Փառեն քահանա Առաքելյանը, երիտասարդների անունից իր երախտագիտությունն հայտնեց Հայր Սուրբին բովանդակալից և հետաքրքիր բանախոսության համար, հույս հայտնելով, որ նման հանդիպումները կլինեն շարունակական:
 

Ծրագիրն իրականացվեց Արագածոտնի թեմի երիտասարդաց միության և Հոլանդիայի Ալմելո քաղաքի հոգևոր հովիվ Տեր Մաշտոց քահանա Բաղդասարյանի ու տեղի երիտասարդաց միության հետ համագործակցությամբ: