Սպիտակ տանը բացատրել են, թե ինչու է Բայդենը որոշել ներում շնորհել որդուն

ԱՄՆ նախագահ Ջո Բայդենը որոշել է ներում շնորհել իր որդուն՝ Հանթեր Բայդենին՝ մտավախություն ունենալով, որ Հանրապետական ​​կուսակցությունը չի դադարեցնի նրա նկատմամբ հետապնդումը։ Այս մասին հայտարարել է Սպիտակ տան մամուլի քարտուղար Կարին Ժան-Պիեռը, հաղորդում է The Hill-ը։

«Նախագահի (որդուն - խմբ․) ներում շնորհելու պատճառներից մեկը կայանում է նրանում, որ, կարծես թե, նրա քաղաքական հակառակորդները հանգիստ չեն թողնելու նրան։ Ահա թե ինչու նախագահն այս քայլին դիմեց»,- Gazeta.ru–ի փոխանցմամբ՝ ասել է նա։

Ըստ Ժան-Պիեռի՝ Բայդենը կարծում է, որ իր որդուն «ընտրել են» քաղաքական դրդապատճառներով։

«Նախագահը պայքարել է այս որոշման դեմ, նա այն ընդունել է այս շաբաթավերջին և որոշել է առաջ շարժվել ու ներում շնորհել որդուն», - հավելել է խոսնակը։

Դեկտեմբերի 2-ի գիշերը հայտնի դարձավ, որ Ջո Բայդենը հրամանագիր է ստորագրել իր որդուն ներում շնորհելու մասին, ով նախկինում մեղադրվում էր ապօրինի զենք պահելու և հարկային օրենսդրությունը խախտելու մեջ։