Սիրիական զորքերը հակահարձակում են սկսել Հալեպի մոտ

Սիրիական բանակի ստորաբաժանումները հակագրոհ են սկսել «Ջաբհաթ ան Նուսրա» ծայրահեղական խմբավորման գրոհայինների դիրքերի ուղղությամբ, որոնք գրավել են ավելի քան 20 բնակավայր Հալեպ քաղաքից հյուսիս և արևմուտք՝ Դամասկոսից 360 կմ հեռավորության վրա, հայտնում է լիբանանյան Al Mayadeen հեռուստաալիքը։

 Գործողության ընթացքում կառավարական ուժերն ազատագրել են Ալ-Բակում քաղաքը։ Ավելի վաղ Հալեպ են տեղափոխվել Սիրիայի այլ շրջաններից ռազմական ուժեր։ Դամասկոսն ու Հալեպը կապող միջազգային մայրուղու երթեւեկությունը արգելափակվել է զինված հարձակումների սպառնալիքի պատճառով։

Հալեպի մերձակայքում գտնվող ռազմաճակատի մի քանի հատվածներում կառավարական ուժերին հաջողվել է զսպել հակառակորդի առաջխաղացումը։ Վերջինը կորուստներ է կրել, մի քանի հարյուր գրոհայիններ ոչնչացվել են։

Ռազմական աղբյուրները հինգշաբթի օրը Al Watan թերթին հայտնել են, որ սիրիական հրետանին հարվածներ է հասցրել զինված ուժերի թիկունքի մատակարարման գծերին Հալեպի արվարձաններում և Իդլիբ նահանգում։ Սիրիական օդուժն ու անօդաչու թռչող սարքերը գրոհել են թշնամու դիրքերը։