Հովիկ Աղազարյանի՝ Մոսկվայի ընկերն, ինձ թվում ա, «Կարլսոնի» պես մի բան ա, գոյություն չունի. Ալեն Սիմոնյանը հեգնում է (տեսանյութ)

ԱԺ նախագահ Ալեն Սիմոնյանը լրագրողների հետ զրույցում հայտնել է, որ բացասական է վերաբերվում ՔՊ խմբակցության պատգամավոր Հովիկ Աղազարյանի՝ մանդատը վայր դնելու վերաբերյալ վարչապետի խնդրանքը մերժելուն։

«ՀՀ վարչապետը Հանրային հեռուստաընկերությամբ դիմել է նրան հրապարակային խնդրանքով, և ես չեմ կարծում, որ նման պարագայում ճիշտ է այդ խնդրանքն անտեսել, մերժել»,- ասել է նա։

Հարցին՝ արդյո՞ք Սիմոնյանը սպառնացել  է Աղազարյանին, նա պատասխանեց․ «Եթե ես մեկին սպառնում եմ, դա անում եմ տեսախցիկների առաջ։

Խոսք գնում է նրա մասին, որ անկեղծ զրույց է տեղի ունեցել, այդ պարագայում իրավիճակը խոսակցության մասնակիցների մեջ շատ ավելի բարդ է, խոսքը էմոցիոնալ խոսքի մասին է, բավականին երկար զրուցեցինք, ես չեմ քննարկել պատճառը, կամ հարցը, այլ որ կա նման խնդրանք, և այդ խնդրանքը ես կարծում եմ, որ պետք է բավարարվի։ Տարիներ շարունակ պայքարել ենք, ու տարբեր ֆորմատներով կուսակցական աշխատանքեր ենք վարել, երբ ինձ հետ գալիս են պատգամավորները խոսում են ինչ-որ հարցով, դա իմ նկատմամաբ ճնշում չէ»։

Անդրադառնալով Աղազարյանի հետ առնչվող քրեական գործերին՝ նա նշել է․

«Ցավում եմ, որ ԱԺ պատգամավորներ կան, որոնք չեն հասկանում՝ ԱԺ պատգամավոր լինելն այլևս իրենց որևէ քրեական գործից չի փրկելու։ Եթե որևէ պատգամավորի վրա կա քրեական գործ՝ ուզում ես մանդատդ վայր դիր կամ մի դիր, դա չի օգնելու, չի փրկելու։ Եթե ինչ–որ մեկը կարծում է, եթե մի ձեռքով որպես կաշառք, օրինակ, կոճի թել վերցնի, ասի՝ մանդատ ունեմ, դա ինձ փրկում է՝ չեն հասկացել որտեղ են գտնվում»,– ասել է նա՝ նշելով, որ գործի նյութերին ծանոթ չէ։

Խոսելով Հովիկ Աղազարյանի մոսկվայաբնակ ընկերոջ մասին, ում հանդիպանը դեռ սպասում է ՔՊ–ական պատգամավորը, Սիմոնյանը ասել է․ «Մոսկվայի ընկերը ինձ թվում ա «Կարլսոնի» պես մի բան ա, գոյություն չունի»։