ՀՀ վարչապետի հանրային խնդրանքը մերժելը ճիշտ չէ․ Ալեն Սիմոնյան (տեսանյութ)

Ազգային ժողովի նախագահ Ալեն Սիմոնյանը պատասխանել է լրագրողների՝ Հովիկ Աղազարյանի մանդատը վայր դնելու հետ կապված հարցերին։

Հարցին, թե Հովիկ Աղազարյանին խմբակցությունից կհանեն թե ոչ, Ազգային ժողովի նախագահը պատասխանեց, որ  իր կարծիքով, եթե Աղազարյանն իրեն թիմից դուրս է դնում, ապա նա այդ թիմի հետ այլևս ճանապարհ չունի շարունակելու։

«Եթե Հայաստանի վարչապետը ինձ նման բան խնդրի, ես վայրկյան անգամ չեմ ընդիմանա այդ խնդրանքին» - պատասխանեց Սիմոնյանը լրագրողի այն հարցին, թե ի՞նչ կաներ նա Աղազարյանի փոխարեն։

Ալեն Սիմոնյանի խոսքով՝ էնպես չի, որ վարչապետն առավոտյան արթնացել և որոշել է, որ նման խնդրանք կամ հրահանգ պետք է տա։ Մարդիկ սխալներ են անում, ստեղծում են խնդիրներ համակարգի, արդարադատության և այլնի հետ կապված։ Այդ արձանագրություններից հետո երկրի ղեկավարը պարտավոր է հետևություններ անել։

«Խնդիրը կայանում է նրանում, որ ըստ ձեզ վարչապետի բոլոր որոշումները, մենք նույնիսկ անհամաձայն լինելով ընդունում  ենք, քանի որ չենք կարող նրան հակառակվել։ Էդպես չի՜» - ասաց Սիմոնյանը։

Լրագրողի, այն հարցին, թե Աղազարյանի  մանդատը վայր չդնելու որոշումը կապ ունի՞ նրա քրեական գործերի հետ, Սիմոնյանը պատասխանեց․ «Ես ցավում եմ, որ պատգամավորներ կան, որոնք չեն հասկացել, որ պատգամավոր լինելն իրենց ոչ մի քրեական պատասխանատվությունից չի փրկելու։ Եթե կա քրեական գործ, ով ուզում է լինես, դա քեզ չի փրկելու»։