Դատարանները պարտավոր կլինեն անշարժ գույքի նկատմամբ արգելքի մասին որոշումները ուղարկել էլեկտրոնային եղանակով

Կառավարությունն օրենսդրական փոփոխություններ է նախաձեռնում, որոնք պարտավորեցնում են դատարաններին անշարժ գույքի սահմանափակումներ կիրառելու, դրանք փոխելու կամ վերացնելու վերաբերյալ բոլոր որոշումները ուղարկել անշարժ գույքի պետական ռեգիստր՝ էլեկտրոնային եղանակով։  Նախագիծը հրապարակվել է «e-draft» իրավական ակտերի հարթակում։

Նախագիծը նպատակ ունի ապահովել դատական համակարգի և անշարժ գույքի պետական ռեգիստրի միջև փաստաթղթաշրջանառության արագությունն ու արդյունավետությունը։ Էլեկտրոնային մեխանիզմների կիրառմամբ կխուսափվի թղթային արխիվների ավելացումից, ինչպես նաև կկրճատվեն գործընթացների ձգձգումները։

Դատարանները պարտավոր են անշարժ գույքի սահմանափակումների վերաբերյալ իրենց որոշումներն ուղարկել անշարժ գույքի պետական ռեգիստր՝ կառավարության սահմանած էլեկտրոնային տեղեկատվական համակարգերի միջոցով։ Սա ներառում է՝ հայցի ապահովման միջոցների կիրառումը կամ դրանց վերացումը, քրեական վարույթներում գույքի արգելադրման և դրա վերացման որոշումները, սնանկության վարույթներում կիրառվող մորատորիումներ և գույքի արգելադրումներ։

Նախագծի ընդունման արդյունքում ակնկալվում է, որ դատարանների որոշումները ավելի արագ կհասցվեն պետական ռեգիստր, կբարձրանա գործարքների օրինականության ապահովման մակարդակը կավելանա դատական ակտերի կատարման թափանցիկությունը։

Այս նախաձեռնությունը համահունչ է Կադաստրի կոմիտեի կողմից ներդրված էլեկտրոնային համակարգերի զարգացման նպատակին, ինչը նշված է ՀՀ կառավարության 2021-2026 թվականների ծրագրում։

Այս փոփոխությունները կնպաստեն դատական համակարգի թվայնացմանը և կդարձնեն անշարժ գույքի սահմանափակումների գործընթացները ավելի արագ, թափանցիկ և արդյունավետ։