Միլիոնատիրոջը սպանած երիտասարդն իր արարքը բացատրել է «այդ մակաբույծներն իրենք են խնդրել» բառերով

Միլիոնատիրոջ սպանության մեջ կասկածվողի մոտ գտել են գրություն, որում նա մանրամասն բացատրում է իր գործողությունները։ Այս մասին հայտնում է The New York Times-ը։

Ձերբակալության ժամանակ 26-ամյա Լուիջի Մանջիոնեի մոտ, ով կրակել էր UnitedHealthcare առողջապահական ապահովագրական ընկերության ղեկավարի վրա, հայտնաբերվել են կեղծ փաստաթղթեր, զենքեր և երեք էջանոց գրություն, որում նա դիմում է ՀԴԲ-ին և իրավապահ մարմիններին։

Մանջիոնեն գրել է, որ հանցագործությունը կատարել է միայնակ։  Նա իր ատելությունը UnitedHealthcare-ի ղեկավարի նկատմամբ բացատրել է հետևյալ խոսքերով.

«Հիշեցնում եմ՝ ԱՄՆ-ն աշխարհի ամենաթանկ առողջապահական համակարգ ունեցող երկիրն է, սակայն կյանքի տեւողության առումով մենք զբաղեցնում ենք մոտ 42-րդ տեղը։ Միևնույն ժամանակ, UnitedHealthcare-ը շուկայական կապիտալիզացիայով ԱՄՆ-ի խոշորագույն ընկերություններից է և այս ցուցանիշով զիջում է միայն Apple-ին, Google-ին և Walmart-ին։ Այն աճել է և շարունակում է աճել, բայց արդյո՞ք մեր կյանքի տևողությունը աճել է: Իրականությունն այն է, որ սրանք չափազանց մեծ իշխանություն են ձեռք բերել և շարունակում են չարաշահել մեր երկիրը հսկայական շահույթների համար, քանի որ ամերիկյան հասարակությունը թույլ է տալիս դա անել»: