94-ամյա տղամարդն ու 89-ամյա կինն ամուսնալուծությունից 50 տարի անց նորից ամուսնացել են

Ամերիկացի տարեց տղամարդն ու կինն ամուսնացել են ամուսնալուծությունից 50 տարի անց։ Այս մասին գրում է KARK.com-ը։

Ֆեյ Գեյբլը և Ռոբերտ Վենրիխը ծանոթացել են 1940-ականների վերջին։ Ռոբերտը Ֆեյի ավագ եղբայրների լավագույն ընկերն է եղել, և մի անգամ էլ նրանց ասել է, որ մի օր կամուսնանա իրենց քրոջ հետ: Եվ այդպես էլ եղել է. Գեյբլը և Վենրիխն ամուսնացել են 1951 թվականի նոյեմբերին, և իրենց ամուսնության ընթացքում ունեցել չորս երեխա: Չնայած դրան, նրանք ամուսնալուծվել են 1975 թվականին։ Ամուսինները նախընտրում են չխոսել ամուսնալուծության պատճառների մասին։

Որոշ ժամանակ անց երկուսն էլ գտել են նոր զուգընկերներ և երկար տարիներ ապրել երկրորդ ամուսնության մեջ, մինչև որ այրիացել են: Միևնույն ժամանակ, Գեյբլի և Վենրիխի հարազատները պնդում են, որ նրանք միշտ լավ հարաբերությունների մեջ են եղել և հաճախ են միասին մասնակցել ընտանեկան տոներին։ Վերջերս նախկին ամուսինները որոշել են, որ ժամանակն է նորից ամուսնանալ։ 94-ամյա Վենրիխն ամուսնության առաջարկություն է արել նախկին կնոջը, որն այժմ 89 տարեկան է։ Ամերիկացիներն ունեն 14 ընդհանուր թոռ և 14 ծոռ: Նրանք բոլորը մասնակցել են տարեցների հարսանիքին, որը տեղի է ունեցել Փենսիլվանիայի հարավ-արևելքում գտնվող Դենվեր քաղաքում։

«Նրանք նման են երկու սիրահարված դեռահասների։ Ամեն ինչ միասին են անում»,- ասել է Քերոլ Սմիթը` զույգի կրտսեր դուստրը: «Նա ասաց. «Նա իմ կյանքի առաջին սերն էր: Ես երբեք չէի մտածում, որ կարող եմ վերադարձնել նրան: Եվ հիմա, երբ ես դա արեցի, ժամանակ չեմ կորցնի»», - Սմիթը մեջբերում է հոր խոսքերը:

«Կարծում եմ՝ մեզ հետ ամեն ինչ կարգին կլինի առաջիկա մի քանի տարիների ընթացքում», - ասել է Վենրիխը: