Փաշինյանը հաստատեց՝ Շիրակի մարզպետ Մուշեղ Մուրադյանն աշխատանքից ազատման դիմում է գրել

Շիրակի մարզպետ Մուշեղ Մուրադյանն աշխատանքից ազատման դիմում է գրել, այս մասին քիչ առաջ կառավարության նիստին հայտարարեց Նիկոլ Փաշինյանը։

«Ես ուզում եմ Պարոն Մուրադյանից շնորհակալություն հայտնել Շիրակի մարզպետի պաշտոնում իր կատարած աշխատանքի համար և հաջողություններ մաղթել հետագա համագործակցության հույսով և հեռանկարով»,- նշեց վարչապետը:

«Պարոն վարչապետ, շնորհակալություն եմ հայտնում Ձեր բարձր վստահության համար: Շուրջ 2 տարվա ընթացքում իմ հմտությունների, գիտելիքների, հնարավորությունների և լիազորությունների շրջանակում ինչքան որ կարողացել եմ, ծառայել եմ ՀՀ-ին, Շիրակի մարզը զարգացնելուն: Անմիջապես Ձեր օգնությամբ և Կառավարության բազմաթիվ ծրագրեր են իրականացվել Շիրակի մարզում: Ես լիահույս եմ, որ դա շարունակական կլինի, և օգտվելով առիթից՝ նաև ուզում եմ շնորհակալություն հայտնել Շիրակի մարզի բնակիչներին, համայնքներին՝ համատեղ աշխատանքի համար, որոնց առօրյա հոգսով և կյանքով ապրել եմ ու շարունակելու եմ ապրել: Մշտապես կլինեմ իմ թիմի կողքին»,- ասաց Մուշեղ Մուրադյանը:

Ավելի վաղ  Euromedia24.com-ը հայտնել էր, որ Շիրակի մարզպետ Մուշեղ Մուրադյանը հրաժարականի դիմում է գրել և կառավարության նիստին ներկայացվելու է նրա հրաժարականը։