Մարդիկ, ովքեր քնում են վեց ժամից պակաս, հակված են քաշի ավելացման. բժիշկ

Քնի ժամանակ օրգանիզմը վերականգնվում է, ինչն անհրաժեշտ է հոգեբանական, էմոցիոնալ և ֆիզիկական առողջությունը պահպանելու համար, ասել է էնդոկրինոլոգ Իրինա Լենկինան։ Կլինիկայի Telegram ալիքում բժիշկը բացատրել է քնի պակասի վնասակար ազդեցությունն օրգանիզմի վրա։

Բժիշկը ուշադրություն է հրավիրել այն փաստի վրա, որ շատ քիչ քնի պատճառով՝ վեց ժամից պակաս, մեծանում է 2-րդ տիպի շաքարային դիաբետի, ինչպես նաև սրտանոթային հիվանդությունների զարգացման ռիսկը։

Բացի այդ, քնի պակասը բացասաբար է անդրադառնում ախորժակի վրա, քանի որ քնի պակասի դեպքում օրգանիզմը բարձր կալորիականությամբ սնունդ է պահանջում, շարունակել է մասնագետը։ Արդյունքում, մարդը սկսում է ավելի շատ ճարպային և ածխաջրերով հարուստ սնունդ օգտագործել: Լենկինան զգուշացրել է, որ մարդիկ, ովքեր քնում են վեց ժամից պակաս, հակված են քաշի ավելացման:

Քնի ընթացքում օրգանիզմը սինթեզում է ախորժակը կարգավորող կարևոր հորմոններ՝ լեպտին և գրելին։ Լեպտինը ճնշում է ախորժակը, իսկ գրելինը, ընդհակառակը, խթանում է այն։ Քնի պակասը նվազեցնում է լեպտինի մակարդակը և բարձրացնում գրելինի մակարդակը՝ հանգեցնելով չափից շատ ուտելուն։

Բժիշկը վստահեցրել է, որ բավարար քունը ոչ միայն հանգստանալու միջոց է, այլև նորմալ քաշի պահպանման և առողջ ապրելակերպի գրավական։ Ավելի լավ քնելու համար նա հորդորել է սահմանափակել սննդի ընդունումը քնելուց մի քանի ժամ առաջ, օդափոխել ննջասենյակը, մի կողմ դնել գաջեթները: