Թուրքիայի պաշտպանության նախարարը խոսել է Հարավային Կովկասում տիրող իրավիճակից

Թուրքիան Ադրբեջանի և Հայաստանի միջև խաղաղության համաձայնագրի շուտափույթ ձեռքբերման հույս ունի՝ Հարավային Կովկասում կայուն խաղաղություն հաստատելու համար։

Ինչպես հայտնում է Report-ը, այս մասին հայտարարել է Թուրքիայի ազգային պաշտպանության նախարար Յաշար Գյուլերը՝ ելույթ ունենալով երկրի խորհրդարանում։

«Հետևելով «Մեկ ազգ, երկու պետություն» սկզբունքին՝ մենք միշտ մեր եղբայրների կողքին ենք եղել՝ հանուն Ադրբեջանի կայունության, որի անվտանգությունն ու բարեկեցությունն անբաժան են մեր երկրի անվտանգությունից։ Այդպես էլ շարունակվելու է»,– հայտարարել է նա։

Նա թուրքական բանակն անվանել է «ուժի գործոն, որին ապավինում և վստահում են բարեկամ ու եղբայրական երկրները»։

Անդրադառնալով Սիրիայում տեղի ունեցող վերջին իրադարձություններին՝ թուրք նախարարն ընդգծել է, որ ահաբեկիչներին թույլ չեն տա օգտվել երկրում ստեղծված անկայուն իրավիճակից։