«Աջափնյակ» մետրոյի պարզ փորձաքննությունն ու ՇՄԱԳ-ը անցանք, ուղարկում ենք համալիր փորձաքննության. Ավինյան

«Աջափնյակ» մետրոյի պարզ փորձաքննությունն ու ՇՄԱԳ-ը անցանք, ուղարկում ենք համալիր փորձաքննության: Այս մասին, այսօր՝ դեկտեմբերի 23-ին, Երեւանի քաղաքապետարանի գործակարգավարական նիստին նշեց «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-իի ներկայացուցիչը՝ անդրադառնալով Մետրոյի «Աջափնյակ» կայարանին: 

«Դեկտեմբերի 19-ին կայացել է մետրոյի հարցերով մասնագիտական խմբի նիստը, որի շրջանակներում քննարկվել են նախահաշվային փաստաթղթերի փորձաքննության արդյունքները, կայացվել են որոշումներ և այս շաբաթվա ընթացքում որոշ տեխնիկական ճշգրտումների և աշխատանքների արդյունքում արդեն ամբողջական փաթեթը կներկայացվի համալիր փորձաքննության»,- ասաց ներկայացուցւչը։

Տիգրան Ավինյանը անդրադառնալով թեմային նշեց․ 

«Սա նշանակում է, որ պարզ փորձաքննությունն անցանք, ՇՄԱԳ-ը անցանք ու փակեցինք հարցը: Հիմա ուղարկում ենք արդեն համալիր փորձաքննության»:

Ինչ վերաբերում է Սուրմալու առևտրի կենտրոնի հարակից տարածքում մետրոյի նոր կայարան կառուցելու նախագծին, զեկուցվեց, որ տեխնիկական առաջադրանքը լրամշակվել է, այսօր շրջանառվելու է մասնագիտական խմբի անդամներին, այս շաբաթվա ընթացքում կամփոփեն, կներկայացնեն գնումների վարչությունը մրցույթը հայտարարելու համար։

Ավինյանը հիշեցրեց, որ այս նախագիծն իրականացվելու է քաղաքապետարանի ֆինանսավորմամբ. «Դա շատ կարևոր է: Նաև շատ կարևոր է  կառավարության մեր գործընկերների եւ միջազգային գործընկերների հետ աշխատանքը, որ հետագայում հասկանանք, թե ինչ միջոցով ենք ֆինանսավորելու հենց բուն շինարարությունը»: