Իմ մոտիվացիան հավատքն է Աստծո և կատարածս աշխատանքի նկատմամբ. Մալխաս Ամոյան

Օլիմպիական խաղերի բրոնզե մեդալակիր, Եվրոպայի առաջնության քառակի չեմպիոն և աշխարհի առաջնության ոսկե մեդալակիր Մալխաս Ամոյանը գտնում է, որ Երոպայի առաջնության վերջին չեմպիոնությունը հեշտերից չի եղել:

«Իմ անցկացրած 4 գոտեմարտերից կիսաեզրափակիչն ու եզրափակիչը կառանձնացնեի ինձ համար, քանի որ դրանք ինձ բարդ տրվեցին: Զգացողություններս անբացատրելի են ու շատ ուրախ եմ, որ կարողացա 4-րդ անգամ անընդմեջ հռչակվել Եվրոպայի չեմպիոն: Ինձ համար մրցաշարերը գնալով ավելի են բարդանում, քանի որ հաղթանակի հասնելն ավելի է դժվարանում: Ի տարբերություն առաջին հաղթանակի, որը հեշտ ստացվեց, այժմ ամեն ինչ ավելի բարդ է»,- լրագրողների հետ հանդիպման ժամանակ ասել է Մալխաս Ամոյանը:

Նա խոսել է նաև եզրափակիչ գոտեմարտի ավարտից հետո պարտություն կրած վրացի մարզիկի նկատմամբ ցուցաբերած հարգալից վերաբերմունքի մասին:

Ըստ չեմպիոնի՝ մրցագորգում իրենք մրցում ենք, իսկ դրանից դուրս ընկերական հարաբերություններ ունեն:

«Իմ մոտիվացիան հավատքն է առ Աստված: Հավատքն է իմ նկատմամբ, կատարածս աշխատանքի նկատմամբ: Այժմ ամեն մրցաշարի մասնակցում եմ միայն ոսկե մեդալի համար»,- ասել է Ամոյանը

Հիշեցնենք՝Սլովակիայում ընթացող ըմբշամարտի Եվրոպայի առաջնությունում Հայաստանի ներկայացուցիչ, 77 կգ քաշային Մալխաս Ամոյանը կարիերայում չորրորդ անգամ արժանացել է չեմպիոնի կոչմանը՝ եզրափակչում 3։1 հաշվով վստահ առավելության հասնելով վրացի Ռամազ Զոյձեի նկատմամբ։