Եթե մենք չարտադրենք զենք՝ մեկ ուրիշը դա կանի, և ստիպված կլինենք գնել. Ֆիցոն՝ Փաշինյանին

Որպես Սլովակիայի վարչապետ, ես հետամուտ եմ եղել Սլովակիայի ինքնիշխան արտաքին քաղաքականության հայեցակարգին, որը կողմնորոշված է բոլոր չորս գլխավոր ուղղություններով։ Այս մասին, այսօր՝ մայիսի 26–ին, ՀՀ վարչապետ Նիկոլ Փաշինյանի հետ համատեղ ասուլիսի ժամանակ հայտարարեց Սլովակիայի վարչապետ Ռոբերտ Ֆիցոն։

Ես հաստատում եմ այն փաստը, որ ԵՄ–ն և ՆԱՏՕ-ն մեր կենսատարածքն են, բայց մեզ համար շատ կարևոր է փոխշահեկան երկկողմ հարաբերություններ զարգացնել։ Ես շատ ուրախ էի, պարոն վարչապետ, ձեզնից անմիջականորեն լսելու ձեր երկրի և Ադրբեջանի միջև խաղաղության բանակցությունների կարգավիճակի վերաբերյալ ձեր գնահատականը։ Այդ տեղեկությունը շատ արժեքավոր է ինձ համար և ես ուրախ կլինեմ այդ տեղեկությունը փոխանցել Եվրամիությունում իմ գործընկերներին։

Եթե թույլ կտաք ասել, երբ մենք պատրաստում էինք այս այցը, ես փորձում էի գտնել որոշ կետեր, որոնցով մենք կարող ենք ապագայում բարեհաջող համագործակցել, և ես շատ ուրախ եմ, որ գործարարները, ընկերությունները, որոնք եկան Սլովակիայից, նրանց թվում կան մարդիկ և ընկերություններ, որոնք գործում են այնպիսի ոլորտներում, որոնցում մենք կարող ենք երկուստեք փոխշահավետ համագործակցության հասնել շուտով։

Հարգելի պարոն վարչապետ, դուք նշեցիք միջուկային էներգետիկան, մենք նույն ռեակտորներն ունենք։ Ես ներկայացրեցի, թե որն է մեր տեսլականը, ի՞նչ ենք ուզում անել մենք Սլովակիայում մեր ատոմակայանի հետ կապված։ Մենք խոսում էինք օգտագործված միջուկային վառելիքի մասին, և դուք, և մենք ունենք մասնագիտացած ընկերություններ, եկեք նրանց միավորված ջանքերի միջոցով հրաշալի համագործակցություն ունենալ։ Համագործակցության առաջին ուղղությունը, որի վերաբերյալ մենք պայմանավորվեցինք և այնտեղ կուզենք ներառել մասնագետներին, միջուկային էներգետիկայի ոլորտն է։ Համագործակցության մյուս ոլորտը որը  շատ բաց քննարկեցինք, պաշտպանական արդյունաբերությունն է։ Ես ասացի՝ եթե մենք չարտադրենք զենք, մեկ ուրիշը դա կանի և մենք ստիպված կլինենք գնել։

Եթե մենք պետք է շատ գումար ծախսենք մեր պաշտպանության վրա, ապա անենք այն, ինչ մենք կարող ենք անել, որպես փոքր երկրներ՝ գտնենք ապրանքներ, որոնք մեր կարիքները կբավարարեն և միևնույն ժամանակ այս համագործակցությունը մեզ չի ստիպի գնել ուրիշ խոշոր գործընկերներից, Հյուսիսատլանտյան դաշինքից։

Մեր ռազմական բյուջեում ունեցած ֆինանսավորման հաշվին մենք նախագծում ենք ծրագրեր, օրինակ, հիվանդանոցներ կամ ճանապարհների, կամուրջների վերակառուցում, ես հավատացած եմ, որ բանակին անհրաժեշտ է ենթակառուցվածք, ոչ միայն զենք, ինչպես մենք անցյալում ենք տեսել»,– հայտարարեց Ֆիցոն։