ՔՊ-ն Գորիսում մեծ ժողով կանի՝ Փաշինյանի գլխավորությամբ․ ի՞նչ են քննարկելու դռնփակ հավաքին (տեսանյութ)

«Քաղաքացիական պայմանագիր» կուսակցությունն ամռանը Գորիսում մեծ հավաք կանի՝ Նիկոլ Փաշինյանի գլխավորությամբ։

Euromedia24-ի տեղեկություններով՝ հուլիսի 11-ին գումարվելու է ՔՊ կուսակցության 6-րդ քաղաքական ժողովը։ Նշենք, որ սովորաբար կուսակցության ժողովները տեղի են ունենում Երևանից դուրս՝ որևէ քաղաքում, այս անգամ հանդիպման վայր է ընտրվել  Գորիս քաղաքը։ Կուսակցության քաղաքական ժողովը կտևի 2 օր։

Կուսակցության քաղաքական ժողովին մասնակցում են վարչության անդամները, ՀՀ Կառավարության անդամները, Ազգային ժողովի խորհրդի անդամները և մշտական հանձնաժողովների նախագահների տեղակալները, խմբակցության քարտուղարը, մարզպետները և համայնքների ղեկավարները, ինչպես նաև տարածքային խորհուրդների նախագահները։ 

Վարչության որոշմամբ՝ Քաղաքական ժողովի նիստին կարող են հրավիրվել կուսակցության անդամ հանդիսացող եւ չհանդիսացող այլ անձինք:

Կուսակցության կանոնադրության համաձայն՝ Քաղաքական ժողովի նիստերը գումարվում են Վարչության որոշմամբ՝ տարին երկու անգամ:

 Քաղաքական ժողովին ՔՊ կուսակցության անդամները քննարկելու են  ընթացիկ, քաղաքական, առաջիկա ընտրություններին վերաբերող և այլ օրակարգային հարցեր: 

Քաղաքական ժողովի նիստերը վարում է կուսակցության վարչության նախագահ Նիկոլ Փաշինյանը։

Ավելի վաղ Euromedia24-ը հայտնել էր, որ աշնանը քաղաքական ևս մեկ կարևոր իրադարձություն է տեղի ունենալու։

Սեպտեմբերին տեղի կունենա ՔՊ կուսակցության համաժողովը, որի ժամանակ կուսակցությունը պետք է ընտրի վարչության նոր կազմը։