Հեզբոլլահը մտածում է զենքը կրճատելու մասին

Իսրայելի հետ ավերիչ պատերազմի և տարածաշրջանային հարվածների հետևանքով Լիբանանի "Հեզբոլլահ" շարժումը սկսել է ներքին վերանայումներ՝ քննարկելով սպառազինության մի մասի հրաժարումը՝ առանց ամբողջական զինաթափման։ Աղբյուրների փոխանցմամբ՝ կազմակերպությունն արդեն զիջել է մի շարք պահեստներ Լիբանանի բանակին և այժմ քննարկում է նաև հրթիռների ու անօդաչուների հանձնման տարբերակ՝ Իսրայելի զորքերի դուրսբերման դիմաց։

Սակայն "Հեզբոլլահը" մտադիր չէ ամբողջությամբ հրաժարվել զենքից։ Խմբավորումը ցանկանում է պահպանել թեթև սպառազինություն և հակատանկային միջոցներ՝ Իսրայելի կամ Սիրիայի ծայրահեղականների նոր հարձակման դեպքում ինքնապաշտպանության համար։ Իրանական աջակցությունից հետո մնացած մատակարարման ուղիներն այժմ խզված են, իսկ ֆինանսական ճգնաժամն էլ խորանում է՝ ԱՄՆ-ի և Իսրայելի ճնշման ներքո։

Չնայած մեծաթիվ զոհերին և ավերածություններին, խմբավորման հիմնական շիա համակիրների շրջանում դեռ պահպանվում է աջակցություն։ Սակայն երկրի ներսում "Հեզբոլլահի" հակառակորդները պահանջում են դրա ամբողջական զինաթափում՝ պետական կառույցների նկատմամբ գերիշխանության վերջ դնելու համար։ Ընտրությունների շեմին, կազմակերպությունն իր գոյությունը պահելու համար փորձում է ժամանակ շահել և ամրապնդել քաղաքական դիրքերը։