Նրանք, ովքեր կարում են Բագրատ Սրբազանի գործը, օրը գալու է, պատասխան են տալու. Իշխան Սաղաթելյան (տեսանյութ)

Բագրատ Սրբազանի կեցավայրում բազմաթիվ անգամներ եղել եմ, խոսել եմ, քննարկել ենք և որևէ անգամ ահաբեկչության մասին խոսակցություն կամ այն ինչ որ ասում են, նման բաներ չի եղել, սա մանիպուլյացիա է հանրությանը մատուցելու, թե տեսեք–տեսեք ինչ էին պլանավորում, իրենք էլ այսպես հալածյալի կեցվածք են ընդունել։ Այս մասին այսօր՝ հուլիսի 4–ին, ԱԺ–ում լրագրողների հետ զրույցում նշեց ԱԺ «Հայաստան» խմբակցության պատգամավոր Իշխան Սաղաթելյանը։

«Էս մի հատ մեծ շոու է, մի քանի օր էլ կխոսեն, կանցնի, կգնա, հետո գործը ամբողջությամբ կպարզվի, որ որևէ բան էլ նախատեսված չէր։ Իսկ ի՞նչ վերաբերվում է նրան, որ ասում են՝ ճանապարհները պետք է փակենք երկրից դուրս եկող, դա ոչ միայն ասվել է, այլ դա արել ենք ու ոչ մեկ անգամ։  Դիմադրության շարժման ժամանակ Հայաստանից դուրս եկող ճանապարհները փակել ենք, Սրբազան շարժման ժամանակ այո, երկրից դուրս եկող չորսը մայրուղիները փակել ենք»,–ասաց նա։

Հիշեցմանը, որ ձայնագրության մեջ Բագրատ Սրբազանը խոսում է «երկու հոգու գյուլլելու» մասին, Սաղաթելյանն ասաց. «Ես ասում եմ, որ Սրբազանը նման բան չի ասել, այս ամեն ինչը հարմարեցված, սարքված ինչ-որ բաներ են։

Վստահեցնում եմ ձեզ, կգա մի պահ, որ բոլոր նրանք, ովքեր այս ապօրինության հետևում կանգնած են, կարում են, սարքում են, հարմարեցնում են, իրենք պատասխանատվություն են կրելու այս ամեն ինչի համար։

Չորս տարի փողոցում ենք, բազմաթիվ շարժումներ են եղել, տասնյակ հազարավոր մարդիկ են դուրս եկել փողոց, մենք մի մեքենայի հայելի չենք կոտրել, բայց այս իշխանությունը մի քանի անգամ կրակել է ժողովրդի վրա։ Օրինակ, անցած տարի հունիսի 12-ին, իրենց կրակոցների արդյունքում 201 մարդ վիրավորում է ստացել։  Չորս տարի այդ շարժումների ժամանակ քանի՞ մեքենա է այրվել, քանի՞ շենքեր ենք ներխուժել»։

Ինչ վերաբերում է երեկ հրապարակված փաստաթղթերին, որտեղ կան Հրայր Սարկավագի, Իգոր Սարգսյանի անունները, Իշխան Սաղաթելյանն ասաց. «Իմ ներկայությամբ կոնկրետ նման զրույցներ չի եղել, ես չգիտեմ դրա հավաստիացումը, բայց ես ճանաչում եմ Հրայր Սարկավագին, վստահեցնում եմ, որ պարկեշտ, անձնավորություն է, ոչ մի բանի մեջ չներգրավված։ Ես չգիտեմ էդ ինչ խոսակցություն է, ինչի մասին է, բայց ես 100% համոզում ունեմ, ճանաչելով էդ մարդուն, ինքը չի կարող ներգրավված լինել նման բաների մեջ»։