Գալյանը ներկայացրել է «Արդարադատության նախարարության իրականացված բարեփոխումները»

Արդարադատության նախարար Սրբուհի Գալյանը ելույթով է հանդես եկել Ազգային ժողովի Եվրոպական ինտեգրման հարցերի մշտական հանձնաժողովի նախաձեռնությամբ կազմակերպված՝ «ՀԸԳՀ. Հեռանկարի և գործողությունների միջև կապի ամրապնդում» խորագրով աշխատաժողովին, որին մասնակցում էին նաև Փոխվարչապետ Մհեր Գրիգորյանը, Ներքին գործերի նախարար Արփինե Սարգսյանը, ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանը և Հայաստանում ԵՄ պատվիրակության ղեկավար Վասիլիս Մարագոսը:

 

Սրբուհի Գալյանը ներկայացրել է Արդարադատության նախարարության համակարգմամբ իրականացված առանցքային բարեփոխումները, որոնք գնահատելի են նաև Համապարփակ և ընդլայնված գործընկերության համաձայնագրի կիրարկման տեսանկյունից: Նա ընդգծել է վեճերի այլընտրանքային լուծման մեխանիզմների ներդրման, խտրականության դեմ պայքարի, անձնական տվյալների պաշտպանության ոլորտներում իրականացված քայլերը:

 

Նախարարն անդրադարձել է նաև Արդարադատության նախարարության դերակատարմանը ներպետական օրենսդրությունը ԵՄ օրենսդրությանը մոտարկելու գործընթացում՝ արձանագրելով, որ արդեն իսկ իրականացվել է մի քանի տասնյակ փորձաքննություն, և նախարարությունը շարունակելու է այդ ուղղությամբ կարողությունների զարգացումը:

 

Կարևորելով Համաձայնագրի ռազմավարական նշանակությունը՝ նախարարը ևս մեկ անգամ ընդգծել է, որ Կառավարության որոշմամբ ընդունված Ճանապարհային քարտեզները կարևոր գործիք են Համաձայնագրի արդյունավետ իրականացման համար։ Այնուամենայնիվ, Կառավարության համար հիմնական ուղենիշը մնում է հենց բուն Համաձայնագրով սահմանված պարտավորությունների կատարմանն ուղղված հանձնառությունը։

Այս համատեքստում նա ներկայացրել է Արդարադատության նախարարության կողմից ՀԸԳՀ իրականացման ճանապարհային քարտեզի վերանայման ու նորի մշակման աշխատանքներն ու կիրառված սկզբունքները:

Աշխատաժողովին զեկուցմամբ հանդես է եկել նաև Արդարադատության նախարարի տեղակալ Աննա Կարապետյանը՝ ներկայացնելով քարտեզի նորացման շրջանակում Նախարարության կողմից ձեռնարկված քայլերը, շահագրգիռ մարմիններից ստացված առաջարկների վերլուծության և լրամշակման արդյունքները ու ընթացիկ մարտահրավերները:

 

Գործընկերները բարձր են գնահատել Արդարադատության նախարարության համակարգմամբ իրականացված ծավալուն աշխատանքը՝ շնորհակալություն հայտնելով շարունակական համագործակցության և ներառական գործընթացի համար։

 

Հանդիպման ընթացքում շահագրգիռ մարմինների կողմից ներկայացվել և հասցեագրվել են Համաձայնագրի իրականացման հետ կապված առաջարկներն ու հնարավոր մտահոգությունները: