Բացահայտվել է իդեալական նախաճաշի բաղադրությունը

Օրվա առաջին կերակուրը պետք է հավասարակշռված լինի սպիտակուցներով, մանրաթելերով, վիտամիններով և ճարպերով. նման նախաճաշի օրինակ է բնական մսի համադրությունը ամբողջական հացահատիկի հացի և բանջարեղենի հետ: Այս մասին նշել են սննդաբաններ Անտոնիո Անդուխարը և Բոտիկարիա Գարսիան Hola-ին տված հարցազրույցում։

Եթե սննդակարգում ներառված է կենդանական սպիտակուց, Գարսիան խորհուրդ է տալիս նախապատվությունը տալ բնական մսին, այլ ոչ թե գերմշակված մթերքներին, ինչպիսիք են երշիկեղենը և բեկոնը։

«Սա կարող է լինել հավի կրծքամիս կամ հնդկահավ, խորոված կամ թխած: Չափավորության դեպքում հարմար են նաև պրոշուտոյի (չոր խոզապուխտ) ավանդական տեսակները, ինչպես նաև չորացրած ֆիլեն, եթե դրանք չեն պարունակում հավելանյութեր, ինչպիսիք են օսլան, շաքարը կամ նիտրիտները», - նշել է փորձագետը։

Բժիշկ Անդուխարը, իր հերթին, խորհուրդ է տալիս միսը համատեղել ամբողջական հացահատիկի թթխմորով հացի հետ, որը հարուստ է մանրաթելերով: Որպես լրացուցիչ բաղադրիչ, նա խորհուրդ է տալիս օգտագործել ձիթապտղի յուղ և թարմ լոլիկ. այս մթերքները ծառայում են որպես հակաօքսիդանտների աղբյուրներ և ստեղծում են հաճելի համային հակադրություն։

Սննդաբանը նաև հիշեցրեց մրգերի կարևորության մասին, որոնք պարունակում են վիտամիններ և հանքանյութեր։ Նրա խոսքով՝ նախաճաշը կարող եք ավարտել կաթով կամ այլ ըմպելիքով՝ ըստ ճաշակի, մի բաժակ սուրճով։

Թարգմանությունը՝ Lurer.com-ի