Դուբայում ուկրաինացի մոդելի խոշտանգման դեպքից ահասարսուռ մանրամասներ են հայտնի դարձել

Դուբայում խոշտանգված 21-ամյա ուկրաինացի OnlyFans մոդել Մարիա Կովալչուկի մայրը պատմել է դստեր վնասվածքների մասին ցնցող մանրամասներ: Աննա Կովալչուկի խոսքով՝ իր դուստրը ենթարկվել է դաժան խոշտանգումների, որի ժամանակ փաստացի կտրվածք են արել նրա գլխամաշկի վրա: Այս մասին հաղորդում է The Sun-ը։

Դեպքը տեղի է ունեցել այն բանից հետո, երբ Մարիան մասնակցել է Դուբայում կազմակերպված մասնավոր երեկույթի՝ ենթադրաբար, հարուստ ռուսախոս հյուրերի մասնակցությամբ: Միջոցառումից հետո աղջիկը մեկ շաբաթից ավելի անհետ կորել էր: Ավելի ուշ նրան գտել են ճանապարհի եզրին՝ անգիտակից վիճակում՝ ծանր վնասվածքներով։

Աննա Կովալչուկը կիսվել է Մարիայի վիճակի մասին սարսափելի մանրամասներով: Նա պնդում է, որ դստեր մազերը «կտրվել են դանակով», որից հետո հարձակվողները կտրել են նրա գլխամաշկը։

«Կարծես թե դա արվել է դանակով ուղիղ դեմքին: Կտրվածքը գլխի կենտրոնից հասել է մինչև աչքը, ինչպես նաև կտրել են մազերը», - հեռուստաշոուի ժամանակ ասել է Մարիայի մայրը՝ Աննան։

Մարիան այժմ վերականգնողական կուրս է անցնում Նորվեգիայում: Հաղորդվում է, որ նա ոչինչ չի հիշում միջադեպի մասին, քանի որ հարձակումից հետո կոմայի մեջ է ընկել։ Աղջիկը շարժվում է հենակների օգնությամբ և ստիպված է թաքնվել՝ վախենալով իր կյանքի համար։

Մամուլում հայտնված բժշկական լուսանկարները ցույց են տալիս նրա գլխին հսկայական սպի, որը մնացել է բժիշկների կողմից գլխամաշկը նորից կարելուց հետո։