Մարզպետը վատ տղա չի, իրեն ստիպում են, որ տենց բաներ խոսա. Վարդան Ղուկասյան

Ես  չեմ իմացել, որ մարզխորհրդի նիստ պիտի լինի, ես իմ աշխատակազմի ղեկավարի վրա բարկացել եմ, թե ինչի արագ ինձ տեղյակ չեք պահել և մարդ չեք ուղարկել փոխքաղաքապետի մակարդակով։ Այս մասին մամուլի ասուլիսում նշեց Գյումրիի քաղաքապետ Վարդան Ղուկասյանը՝ անդրադառնալով նրան, որ մարզպետարանում կայացած նիստի ժամանակ Գյումրիի քաղաքապետարանից մարդ չի եղել։

«Միանշանակ գտնում եմ, որ քաղաքապետարանը այդտեղ թերացել է և աշխատակազմի ղեկավարը այդտեղ շատ սխալ է արել։

Ես, իհարկե, չէի մասնակցի, որովհետև մարզպետը ինձ չի շնորհավորել։ Ճիշտ է, ինքը վատ տղա չէ, իրեն ստիպում են, որ ինքը  այդպես բաներ խոսա։ Զգում եմ, որ աշխատանքի բերումով է այդպես անում։ Ես ընդհանրապես սուբորդինացիա պահող մարդ եմ, ես գնահատում եմ ճշմարտությունը, չեմ կարող ասել, որ եթե ՔՊ-ից են, բոլորը վատ մարդ են, չկա այդպիսի բան։ Ամեն տեղ էլ լավն էլ կա, վատն էլ կա։ Այդ հարցերի մեջ շատ չեմ ուզում ես խորանալ։ Ով մեզ հետ կարողանա քաղաքի շահերից ելնելով աշխատել, մենք կաշխատենք անպայման իրենց հետ, բոլորի հետ, և բայց ինքնասիրությունն էլ բարձր պահելով, չափը պահելով, մեր ապրածը գնահատելով։

Հիմա նորմալ աշխատում ենք, ստացվում է, ես  չեմ տեսնում, որ ոտ են պահում, բան են անում։ Պետք է կարողանանք իրար հետ աշխատել։ Հիմա եթե ՔՊ չես, ուրեմն վերջ, թշնամի՞ ես, պիտի դնենք ավտոմատով խփե՞նք։ Ես այդպես բաներ չեմ տեսել, որ տեսնեմ, կասեմ անպայման»,– ընդգծեց նա։