Լարված իրավիճակ՝ Կոտայքի մարզում. Ձորաղբյուրում բնակիչները փակել են գլխավոր ճանապարհը

SHAMSHYAN.com-ի թղթակցի հետ զրույցում բողոքի ակցիայի մասնակիցներն ասում էին. «Էլ չգիտենք՝ ում դիմենք, որ կառույցը մեզ թիկունք կլինի, ամառվա այս տապին 4 օր է խմելու ջուր ընդհանրապես չենք ստանում։ Դիմել ենք տարբեր ատյանների։

Մեկը մյուսի վրա է գցում, հիմնական պատասխանատուն «Վեոլիա ջուրն» է, բայց այդ կառույցը ավելի շատ մեր գլխին պատուհաս է դարձել, քան ու օգուտ է տալիս։

21-րդ դարն է, բայց քարե դարում ենք ապրում, չնայած քարե դարում նման խնդիր հաստատ չի եղել, հիմա ի՞նչ անենք, զգուշացրել ենք, խնդրել ենք, հորդորել ենք, որ ըստ պայմանագրի ինչպես մեզ հետ կնքել եք, ջուրը ժամանակին տվեք։

Եթե նախկինում կիսատ-պռատ էին տալիս, այս վերջին 4 օրերին ընդհանրապես մեր ծորակներից ջուր չի գալիս, բացում ենք՝ օդ է։

Ամոթն էլ է լավ բան։ Ասում եք՝ որակ ենք ապահովում։ Եթե սա է ձեր որակը, ուրեմն դուք մազոխիստ եք։ Տներում կան նորածիններ, անչափահասներ, ավագ սերնդի ներկայացուցիչներ ու նրանց միշտ պետք է ջուր, խնամք, պիտի միշտ պահենք նրանց հիգիենան, բայց 4 օր է՝ ամբողջ Ձորաղբյուրը ջրի կարոտ է մնացել։

Այս պահին ավելի կտրուկ միջոցների չենք դիմում, բայց եթե դրա անհրաժեշտությունը լինի, թե՛ «Վեոլիա ջուրը», թե՛ Կոտայքի մարզպետարանը, թե՛ մյուս կառույցները թող լավ իմանան, որ գյուղ կանգնի, գերան կկոտրի։

Ֆոտոլրագրողը հայտնում է, որ ժամանել էին ՀՀ Ներքին գործերի նախարարության ոստիկանության պարեկային ծառայության Կոտայքի մարզի գումարտակի 2-րդ վաշտի 2-րդ դասակի պարեկները՝ գումարտակի հրամանատար Լևոն Բադալյանի, գումարտակի հրամանատարի տեղակալ Վահագն Կարապետյանի և օրվա պատասխանատու, վաշտի հրամանատար Դավիթ Հովհաննիսյանի գլխավորությամբ։

Բնակիչները մոտ 2 ժամ իրենց բողոքի ակցիան իրականացրեցին և երբ ժամանեց Ձորաղբյուր բնակավայրի վարչական ղեկավարը, ով բանակցություններ վարեց բնակիչների հետ և վերջինները ժամանակվորապես դադարեցրին բողոքի ակցիան, սակայն հայտնեցին, որ եթե 1-2 օրվա ընթացքում խնդիրը չկարգավորվի և կանոնավոր չստանան ջուր, դիմելու են ավելի կտրուկ միջոցների, իսկ հետո պատասխանատուները չասեն «Դավիթ գող-գող եկավ, գող-գող գնաց»։