Թուրքիան բացահայտեց Ռուսաստանի նոր «խաղաղության սցենարը» Ուկրաինայի համար

Թուրքիայի ԱԳ նախարար Հաքան Ֆիդանը հայտարարել է, որ Ռուսաստանը բանակցությունների ընթացքում ներկայացրել է նոր տարբերակ՝ կապված ուկրաինական տարածքների շուրջ հնարավոր համաձայնության հետ։ Նրա խոսքով՝ Մոսկվան պատրաստակամ է մնալ առկա շփման գծում՝ բացառությամբ Դոնեցկի մի հատվածի, որտեղ խոսքը վերաբերում է դեռևս չվերահսկվող 25-30 տոկոսի փոխանցմանը։

Ֆիդանի փոխանցմամբ՝ այս մոտեցմանը զուգահեռ Ռուսաստանը նաև համաձայն է քննարկել Կիևին անվտանգության երաշխիքներ տալու հարցը, ինչը կարող է դառնալ ապագա շրջանակային համաձայնագրի հիմք։ Նա դա որակել է որպես «իրապես հիանալի հնարավորություն»՝ դնելու խաղաղության պայմանագրի հիմնասյուները։

Մոսկվան պաշտոնապես չի մեկնաբանել այս տեղեկությունները։ Վլադիմիր Պուտինի խոսնակ Դմիտրի Պեսկովը միայն նշել է, որ Ալյասկայի գագաթնաժողովի մանրամասների հրապարակային քննարկումը «լավագույն տարբերակը չէ»՝ արձագանքելով ԱՄՆ փոխնախագահ Ջեյ Դի Վենսի հայտարարությանը Ռուսաստանի՝ որոշ հարցերում զիջումների պատրաստակամության մասին։