Ադրբեջանի և Հայաստանի միջև արդեն իսկ խաղաղություն է հաստատվել․ Ալիևը՝ ՉԺՀ նախագահին

Ադրբեջանի և Հայաստանի միջև հարաբերությունների կարգավորման և խաղաղության օրակարգի շուրջ բանակցությունները վարվում են երկկողմանի հիմունքներով։

Այս մասին հայտարարել է Ադրբեջանի նախագահ Իլհամ Ալիևը Չինաստանի Ժողովրդական Հանրապետության նախագահ Սի Ծինփինի հետ Թիենծին քաղաքում կայացած հանդիպման ժամանակ։

Ադրբեջանի ղեկավարը նշել է, որ երկու երկրների միջև արդեն իսկ խաղաղություն է հաստատվել։

Ալիևը նշել է, որ Չինաստանի Ժողովրդական Հանրապետության հետ հարաբերությունների զարգացումը Ադրբեջանի արտաքին քաղաքականության առաջնահերթություններից է։

Պետության ղեկավարը նշել է, որ Ադրբեջանը աջակցում է Չինաստանի դիրքորոշմանը Թայվանի, Հոնկոնգի և Սինծիանի Ույղուրական ինքնավար շրջանի հարցերում և առաջին երկրներից մեկն էր, որը դատապարտել էր Թայվանում անցկացված ընտրությունները։

Ալիևը նշել է, որ երկու երկրների միջև առևտրային հարաբերություններում զգալի աճ է գրանցվել։ Անդրադառնալով «Մեկ գոտի, մեկ ճանապարհ» նախագծին, պետության ղեկավարը Միջին միջանցքով, որը դրա կարևոր մասն է կազմում և անցնում է Ադրբեջանի տարածքով, տրանսպորտի, մասնավորապես չինական բեռների աճը գնահատել է որպես այդ միջանցքի արդյունավետության և գրավչության օրինակ։

Նշելով, որ չին–ադրբեջանան համագործակցությունը նույնպես ամրապնդվում է «Մեկ գոտի, մեկ ճանապարհ» նախագծի շրջանակներում, Սի Ծինփինն ընդգծել է Ադրբեջանի տարածքով չինական ապրանքների տեղափոխման կարևորությունը և այս համատեքստում անդրադարձել է Տրանսկասպյան երթուղու նշանակությանը։

ՉԺՀ նախագահը հայտարարել է, որ իր երկիրը աջակցում է Շանհայի համագործակցության կազմակերպության հետ Ադրբեջանի կապերի ընդլայնմանը։

Սի Ծինփինը նշել է Ադրբեջանի և Հայաստանի միջև ուղիղ երկխոսության կարևորությունը՝ երկարատև խաղաղություն ապահովելու գործում։ ՉԺՀ նախագահը նաև հայտարարել է, որ Չինաստանը աջակցում է Ադրբեջանի  ինքնիշխան զարգացման մոդելին, ընդգծել է Պեկինի հավատարմությունը այլ երկրների ներքին գործերին չմիջամտելու սկզբունքին։